Түүнийг Leo Major гэх бөгөөд Канадын 3-р ядган цэргийн ангийн сайн дурийн албан хаагч байлаа. Тэрээр 1944 оны 6-р сарын 6-ны өдөр холбоотнууд Нормандыг эзлэх тулааны үеэр баруун нүдэндээ буудуулан шархадсан боловч энэ бүхэн түүний эр зоригийг хязгаарлаж чадаагүй юм. Тэрээр тухайн онд Нидерландын Zwolle хотыг Германчуудаас хэний ч тусламжгүйгээр бүрэн чөлөөлөхөөр шийдсэн байдаг. Хэдийгээр холбоотнууд газардан Германчууд ухарсан байсан ч цөөн хэдэн тооны цэргүүд үлдэж иргэдийг нь цаазаар авахаар бэлтгэж байжээ.
Leo Major тухайн цаг үед яг цагаа олсон аврагчийн дүрд хувирсан түүхтэй. Тэрээр шөнө дунд хоёр мөрөндөө хоёр автомат буу үүрч гартаа мөн автомат буу барьж хөлөндөө цэргийн гутал бус пүүз өмсөж ямар ч чимээ гаргалгүйгээр Zwolle хотын гудамжэаар хөндлөн гулд гүйсээр хамгийн их чимээ гарч буй газарт очтол маш олон хүмүүсийг Германчууд хана налуулан зогсоосон байв. Тэднийг буудах гэж байгаа нь илт байсан бөгөөд тэрээр шууд л буугаа гарга онилж Германчуудыг нэвт шүршиж эхэлжээ. Энэ бүхний эцэст тэрээр 15 Герман цэргийг хөнөөсөн бөгөөд 70 гаруй иргэдийн амь насыг аварсан юм. Үүнийх нь төлөө хожим буюу 2005 оны 4-р сарын 14-ны өдөр Leo Major-т Zwolle хотын хүндэт иргэн хэмээх цолыг гардуулсан байдаг.
Гэхдээ энэ бол дөнгөж эхлэл байсан бөгөөд түүний ямар чадалтай эр болохыг Белгийн нийслэл Антверп хотын ойролцоо хийсэн үйлдэл нь бүх нийтэд гэрчилсэн юм. 1944 оны намар тэрээр хотын ойролцоо 2 Герман цэрэгтэй таарч нэг нь зугтах гэхэд нь буудан хөнөөж үлдсэн нэгийг нь олзолсон бөгөөд түүнийг өөрийнхөө офицер дээр хүргэж өгөхийг шаарджээ. Тэрээр офицер дээрээ хүргэж өгөхөд маш олон Германчууд нэг дор буу зэвсэгнээсээ хол хоол ундаа идэж байж таарчээ. Leo Major агаарт хий буудан тэднийг бүгдийг нь хөдөлгөөнгүй болгосон бөгөөд хөдөлгөөн хийх гэж оролдсон цэргүүдийг газар дээр нь буудан хөнөөснөөр цэргүүд бүрэн түүний мэдэлд орсон юм.
Тэрээр бүх цэргүүдийн гарын толгойны харалдаа байрлуулан холбоотны цэргийн хуаран уруу алхуулж байсан бөгөөд замд нь SS-ын машинтай офицерууд тааралдсан бөгөөд эх орноосоо урваж арчаагүй байдал гаргасан өөрсдийнхөө цэргүүдийг офицерууд машинаасаа буудан хороож байлаа. Уг үйл явдал нь leo Major-т Германчууд хичнээн их эх оронч үзэлтэй хүмүүс болохыг ойлгуулсан гэдэг. Гэвч амьд үлдсэн олзны хүмүүсийг цааш зөөсөөр хуаранд авчирхад тэрээр ганцаараа 93 хүнийг олзолсон байжээ. Түүний үйлдлийг бүгд магтан биширцгээж байсан юм. Гэвч түүний түүх үүгээр ч дуусаагүй аж. Тэрээр дэлхийн хоёрдугаар дайн дууссаны дараа Солонгосын хойгийн дайнд хүртэл оролцож хоёр ч удаа эр зоригийн одонгоор шагнуулсан төрөлхийн цэрэг хүн байсан түүхтэй.
