Дорноговь аймгийн Зүүнбаян дахь хурандаа Д.Өлзийбаяр захирагчтай 336 дугаар ангид алба хааж байсан 19 настай эрэгтэй нас баржээ. Талийгаач Эрдэнэт хотод оршин суух хаягтай 19 настай А нь 2018 оны 11 дүгээр сард хугацаат цэргийн албыг хаахаар тус ангид ирсэн байна. Цагдаагийн байгууллагаас Байлдагч гадны нөлөөгүй нас барсан гэсэн Шүүх эмнэлгийн урьдчилсан дүгнэлт гарсан. Үхлийн шалтгааныг нарийн тогтоохоор авсан эсийн шинжилгээний хариуг хүлээж байна. Хуульд заасны дагуу 21 хоногийн дотор Шүүх эмнэлгийн дүгнэлт гарна гэдэг мэдээллийг өглөө.
Хэргийн газарт ЗХЖШ цагдаагийн байгууллагын ажлын хэсэг гаран ажиллаж байгаа аж. Цахим орчинд тархсан гэрэл зургуудтай холбогдуулан талийгаачийн ар гэрийнхэн болон олон нийт алба хаагчийг бусдад зодуулсны улмаас бэртэл авч амь хохирсон байж болзошгүй гэж үзэж байгаа юм. Тэгвэл зурагт харагдаж буй хүрэн толбо нь нас барснаас хойш цогцост үүссэн хүүрийн толбо болохыг албаныхан тайлбарлалаа. Тиймээс энэхүү толбо нь бусдад зодуулснаас үүссэн гэдэг ташаа мэдээлэл болохыг анхааруулав.
Талийгаачийн ар гэрийнхэн бусдад зодуулсан байж болзошгүй гэдэг үндэслэлээр цагдаагийн байгууллагад шалгуулахаар гомдол гаргаад байгаа юм байна. Хэргийг Дорноговь аймгийн Сайншанд суман дахь цагдаагийн хэлтэс мөрдөн шалгах ажиллагааг үргэлжлүүлж байгаа юм.
Хүүрийн толбо: Зүрхний үйл ажиллагаа зогссоны дараа цус тунгалагын шингэн хүндийн жингээрээ биеийн доор байрлалтай хэсгүүд рүү тунана. Тунасан цус шингэн венийн судсуудыг аажим тэлснээр хүүрийн толбо үүсгэдэг. Нуруугаар хэвтсэн үед цогцсын ар гадаргууд, хэвлийгээр хэвтсэн үед нүүр цээж хэвлийн урд хэсгээр дүүжлэгдсэн бол хэвлий ба бүсэлхийн доод хэсэг гарын шуу сарвуу гуя шилбэний эргэн тойронд үүснэ.
