Хүн бүрт хүсэл мөрөөдөл гэж бий. Харин хүслээ биелүүлэх зоримог алхам хийх сэтгэл зүй хүн бүрт байгаад байдаггүй. Тэгвэл Aloha Wanderwell гэх бүсгүй мөрөөдлөөрөө амьдрах сонголт хийж дэлхийг Ford машинаар тойрон аялсан байдаг. Бүсгүй 1922 онд анх Henry Ford гэх эрхэмтэй уулзаж ярилцсанаар Ford club-ын гишүүн болж бүсгүйгийн бүхий л аяллын зардал болон машиныг Ford компани хариуцахаар болсон юм. Энэ явдал нь бүх цаг үед түүнийг дэлхийг тойрон аялсан хамгийн анхны эмэгтэй хүн гэх хүндэт хэргэмийн эзэн болгосон юм.
Тэрээр 1922-1927 оны хооронд дэлхийн 80 улсаар хөндлөн гулд аялан 804,000 орчим км замыг Ford машины хүчирхэг мотороор туулсан түүхтэй. Бүсгүй Хятад улсад явж байгаад хүндхэн асуудалд орж машин нь эвдэрч дээрэмдүүлэх гэж байхад нь тун муу хувцастай, ядарсан боловч Европ царайтай хүмүүс түүнд тус болж амийг нь аварч байжээ. Чухам ямар хүмүүс болохыг нь хожим мэдсэн бөгөөд тэд Хаант Орос улсын цэргүүд Монголоор дамжин Гуанжу хүрч явахтай нь таарсан хэрэг.
Улмаар бүсгүй Монголоор нэвт дамжин ЗХУ-ын нутагт нэвтэрч трансибирийн төмөр зам даган явсаар Польш улсад очин тэндээсээ Испани хүртэл яваад урагшаа Мароккогоор дамжин Африк тивд хүрч тэндээс усан онгоцоор Австрали орсон байдаг. Австрали тивээс харин өмнөд Америкт очсон бөгөөд 1927 онд түүний аялал Калифорни мужид очсоноор өндөрлөсөн түүхтэй.
Гэвч түүний амьдралд нэгэн харамсалтай зүйл тохиолдсон нь 1932 онд түүний нөхөр өөрийн завин дээр бусдад алуулсан явдал юм. Иймд бүсгүй 1933 онд өөр хүнтэй дахин хурим хийж тухайн үеэс эхлэн ном бичиж эхэлсэн бөгөөд түүний ном бүх цаг үед хамгийн сайн борлуулалттай ном болж чадсаар ирсэн аж. Орчлонгийн жамаар Aloha Wanderwell 1996 онд 89 насандаа таалал төгсжээ. Тэрээр өөрийн бичсэн номыг нийтдээ 10 удаа хэвлүүлсэн бөгөөд хамгийн гайхалтай нь ном 10 удаагийн турш бестселлер болсон бөгөөд бүхэл бүтэн нэг зууны бүх цаг үеийн Америкчууд түүний номыг мэддэг болж байгаа юм.
