Гренландаас баруун зүгт орших 1.3 км урттай, 1.9 км өргөнтэй ямар ч оршин суугчтай ширхэг ч модгүй халзан арлыг Hans арал хэмээн нэрлэдэг. Уг аралд 14-р зууны үед Иниут омгийнхон загас агнуурын төв болгон ашиглаж байсан бөгөөд Канад дахь уугуул иргэдийг хөнөөж тэдний тоо цөөрснөөр уг арлыг 19-р зууны үед Канадын засгийн газар өөрсдийн эзэмшилд авах шийдвэр гарган анх удаа Канадын тугийг зоосон байдаг. Ийнхүү туг зоосноос 5 жилийн дараа Канадын тэнгисийн цэргүүд арал дээр очиход Канадын тугны оронд Данийн туг тухайн улсын хамгийн сайн чанартай вискиний хамтаар цэргүүдийг хүлээж байлаа. Энэ бүхэн Канадын эрх баригчдын уурийг хүргэн тэдэнтэй албан ёсны уулзалт хийхэд хүргэсэн юм.
1902 онд Канад болон Данийн дээд хэмжээний уулзалтын үеэр арлын асуудлыг хөндсөн бөгөөд тухайн үед Данийн төлөөлөгч 1850 онд парламентын шийдвэрээр уг арлыг Их Британы мэдлээс өөрсөндөө албан ёсоор авсан бичгийг үзүүлжээ. Гэвч уг бичгийг ямар ч үндэслэлгүй бөгөөд тухайн үед Их Британийн мэдэлд уг арал байсан бол Канадын зөвшөөрлөөр шилжүүлэх ёстой. Учир нь Их Британи Канад хоёр ялгаа байхгүй нэг улс хэмээн маргалджээ. Ийнхүү асуудлыг шийдэхээр Их Британы элчин сайдыг хүлээн авч уулзсан боловч Английн талаас асуудлаа өөрсдөө шийд хэмээн зугтсан байдаг.
Тэр цагаас хойш хоёр улсын тэнгисийн цэргүүд жил бүр тус арал дээр очин өөрсдийн тугийг зоож өөрсдийн улсынхаа хамгийн дээд зэрэглэлийн вискиг үлдээн явдаг уламжлал тогтсон бөгөөд ирэх жил нь нөгөө улсынх нь цэргүүд ирэх үед өмнөх тугийг нь буулган өөрсдийнх нь тугийг оронд нь зоодог байна. Яг энэ байдал маш олон жилийн турш үргэлжилсээр 1972 онд НҮБ-ын хурал дээр тус асуудлыг хөндсөн бөгөөд Европын улсуудын санаачилгаар тус хоёр улсын далайн хилийг тогтоох гэж хичээсэн боловч ямар ч үр дүнд хүрээгүй аж. Учир нь хоёул тус арлыг эзэмшихийг хүссэн бөгөөд дундуур нь хувааж өмчлөх ямар ч боломжгүй хэмээн үзжээ. Иймд тус арлын төлөөх тэмцэл хоёр улсын хооронд өнөөдрийг хүртэл үргэлжилсээр байгаа бөгөөд энэ тэмцэл нь дэлхий дээрх хамгийн соёлтой газар нутгийн маргаан хэмээн бүртгэгдсэн байна. Өнөөдөр Канадад хэвлэгдсэн газрын зурагт уг арлыг өөрсдийн өнгөөр зурдаг бол Дани улсын хувьд ч ялгаагүй өөрсдийн мэдэлд зурсаар байдаг аж. Харин Википедиа сайтад уг арлын эзэмшигчийг Канад болон Дани хэмээн хослуулан бичсэн байдаг юм.
