1912 оны 4-р сарын 15-ны өдөр Charles Lightoller өөрийн бүхий л чадлаар хөлөг онгоцны багийнхныг дайчлан хүүхэд эмэгтэйчүүдийг аврах завинд суулгасаар байлаа. Гэхдээ онгоц удаан тэсэж чадахгүйг тэрээр хамгийн сайн мэдэж байсан хүмүүсийн нэг байсан юм. Тэрээр хөлгийн зүүн тавцанг хариуцаж байсан бөгөөд тэнд байсан хүн бүхнийг суулгахыг хүссэн ч аврах завь хүрэхгүй байхын зэрэгцээ онгоц огцом доошилж эхэлжээ. Аврах завь нэгэнт дуусаж сууж амжаагүй хүмүүс эмх замбараагаа алдан бүхий л тийш гүйлдэж байв. Харин өөр нэг буланд номлогчтой хамт хэсэг хүмүүс гэм нүглээ наманчилж байлаа. Хөлгийн ахмад хөлгийн жолоодлогын хэсэгт онгоцтой хамт өөрийгөө булшлахаар шийдсэн нь ч харагдав. Charles Lightoller ч гэсэн өөрийгөө Титаниктай хамт ахмад хүний ёсоор оршуулахыг хүсэж онгоц живэн живтэл тавцан дээр хөдөлгөөнгүй зогсохоор шийдсэн байдаг. Жам ёсоороо онгоц усан дотор хүчтэй орж татах хүчний нөлөөгөөр дээр байсан бүхнийг хуу хаман доош шигдэх үед усан онгоцны дулаалгын хэсэгт дэлбэрэлт үүссэнээс болж Charles Lightoller-ыг далайн мандалд хүчтэй чулуудан гаргажээ. Яг л эрлэгийн орон түүнийг угтан авахад бэлэн бус байсан мэт.
Ийнхүү санамсаргүй байдлаар амьд үлдсэн эр үрэгдсэн нь одож амьд үлдсэн нь амьдардгийн жамаар үргэлжлүүлэн амьдарсаар дэлхийн 1-р дайнд байлдааны шумбагч онгоцны ахмад болон тулалдаж Германы дөрвөн усан онгоцыг живүүлж Их Британы төрийн одон хүртсэн байна.
Charles Lightoller 1874 онд төрсөн нэгэн бөгөөд 1940 онд Германы арми Dunkirk дахь Их Британы цэргийн эвсэл уруу дайрах үед 66 настай ахмад далайчин өөрийн жижиг моторт завиар Dunkirk-ын зүг хөдлөн сайн дураараа эх орныхоо төлөө гар бие зүтгэн нэг удаагийн явалтаар 21 цэрэг суулган нүүлгэн шилжүүлэлтийн ажиллагаанд оролцон нийт 127 цэргийн амийг аварсан байдаг. Түүнийг цэргүүдийг суулган моторт завьтай явж байхад Германы онгоцнууд хэд хэдэн удаа довтолсон боловч гайхамшиг тохиолдон бүгд аврагдсан байна. Уг үйлдэл нь түүний эр зориг, эх орноо гэсэн чинь сэтгэлийн баталгаа болсон тул ерөнхий сайд Черчилль түүнд өөрийн биеэр загалмай одон гардуулсан юм.
