Уг аймшиг үйл явдал 1959 оны 2-р сарын 1-2ны өдрүүдэд болсон хэмээн таамагладаг бөгөөд Коммунист намын 19-р хуралд зориулан Уралын политехникийн их сургуулийн цанчдын клубийнхан 9 хүний бүрэлдэхүүнтэйгээр Хойд Уралын нэгэн ууланд Игорь Дятловоор ахлуулан авирцгаасан байдаг. Тэдний аялал 1959 оны 2-р сарын 15-ны өдөр гэхэд дуусч хотод эргэж ирэх ёстой байсан ч хэн ч иргэж ирээгүй тул ямар нэгэн муу зүйл болсныг ойлгож хайгуулын баг илгээсэн түүхтэй.
Уг нь тэд 2-р сарын 1-ны өдөр уулын амаар нэвтэрч тэмдэглэгээт газарт буудаллах ёстой байсан ч цаг агаарын байдал эрс муудаж цасан шуурга шуурч эхэлсэн тул багийн гишүүд алхаж буй чигээсээ төөрч Холят Сяхлын зүг явцгаасан аж. Төд удалгүй тэд өөрсдийгөө төөрсөн гэдгийг мэдсэн бөгөөд яг явж байсан газартаа нөмөр газар олж буудалласан байна. Тэднийг хайж олсон эрлийн багийнхан дээрх дүгнэлтийг гаргасан бөгөөд цагдаа, цэрэг, онцгой байдлынхан нисдэг тэрэг, гинжит машин зэргийг ашиглан хайсан байдаг.
Эрлийн багийнхан тэдний майхныг олсон бөгөөд майхны дэргэдээс хоёр оюутны цогцос олдож 200-250 метрийн зайтай газраас өөр 3 оюутны цогцос олдсон аж. Эхлээд тэднийг уулнаас бууж яваад зүг чигээ алдаж төөрснөөр осгож үхсэн байна хэмээн таамаглаж байлаа. Учир нь тэдний биед ямар ч халдлагын ул мөр байгаагүй бөгөөд гагцхүү майхныг хутгаар зүссэн байсан нь цагдаа нарын гайхшралыг төрүүлж байв.
Үлдсэн хүмүүсийн цогцос олдохгүй байсаар хэрэг явдал болсноос 2 сарын дараа дөрвөн метр цасны нуранган доороос гаргаж авсан бөгөөд чухам энэ үед л тэд санамсаргүй байдлаар осгож үхээгүй болохыг хүн бүхэн ойлгож эхэлжээ. Эхний олдсон хүмүүс биедээ ямар ч гадны гэмтэлгүй байсан бол сүүлд олдсон 4 хүний нэг нь тархиа хүчтэй хагалуулсан бол 2 нь цээж болон хавиргаа хугалуулсан бол үлдсэн нэг нь хэлээ суга татуулсан байдалтай байжээ. Мөн тэдний хүзүүг 180 градус мушгиж аймшигтайгаар тарчлаан алсан байсан нь хүн бүхнийг айдаст автуулж байв.
Ийнхүү шинжээчид чухам тус багийнхан яагаад майхнаа зүсэж гадагш гарав, яагаад хувцас өмсөлгүй шалдан гарч гүйсэн, юунаас тэгтлээ айв, яагаад хүзүү нь мушгирч хэл нь байхгүй болов гэсэн түмэн асуулттай хоцорсон бөгөөд 1959 онд Дотоод хэргийн яамны тушаалаар тус газарт судалгааны баг илгээсэн боловч ямар ч дорвитой хариу олоогүй боловч тус бүс газарт ямар ч амьд амьтан амьдардаггүй болохыг л баттай олж тогтоосон байна. Мөн цогцсуудаас их хэмжээний цацраг идэвхт бодис илэрсэн бөгөөд тэднийг яг авиралт хийж байх үед ойролцоо 50 км зайтай өөр уулчдын баг мөн авиралт хийж байсныг олж мэдсэн бөгөөд тэднээс тухайн үеийн нөхцөл байдлыг асуухад тэнгэрт тод өнгийн гэрлүүд анивчиж байсан, энгийн од гэж бодсон ч арай л өөр санагдсан хэмээх тайлбар өгсөн байдаг.
