Уг муурыг Tama гэх бөгөөд Япон улсад түүнийг андахгүй хүн байхгүй биз. Тэрээр 1999 оны 4-р сарын 29-ны өдөр Kinokawa хотод төрж тэндээ өсөж торниж, өөрийн бүхий л амьдралыг тус хотод өнгөрүүлсэн муур. 2004 оны үед Tama бусад гэр оронгүй хэсэг муурнуудын хамтаар Kishi-ын цахилгаан галт тэрэгний буудлын ойролцоо хүмүүсийн хаягдал хоол идэн амь зогоох болжээ. Япончууд угаас амьтанд хайртай хүмүүс учир Tama ч хоол хүнсээр тэр бүр тасраад байдаггүй байв.
Харин 2004 онд Kishi-ын цахилгаан галт тэрэгний буудал санхүүгийн хүндрэлээс болж цаашид үйл ажиллагаа явуулах боломжгүй болсон бөгөөд буудлаа хаасны дараа тунд байсан Tama муурыг галт тэрэгний буудлын ерөнхий менежер Koyama үрчилж авсан байдаг. Гэвч 2006 онд иргэдийн хүчтэй шаардлагын улмаас улсаас татаас авч тус буудал үүд хаалгаа дахин нээсэн түүхтэй. Иймд нэгэнт буудал дахин ажиллаж эхэлсэн тул Tama-г ажил хийлгэж хоолыг нь олуулахаар шийдэж галт тэрэгний буудлын тасалбар шалгагч болгосон байна.
Угаас Япон хүмүүс бүгд тасалбартайгаа явдаг тул түүний ажил тийм ч их хүндрэлгүй байлаа. Тэрээр тусгай дүрэмт хувцас өмсөж галт тэрэгний бүхээгүүдээр явдаг байсан бөгөөд хүмүүс түүнд тун сайн болж зарим нь түүнийг харахын тулд уг галт тэрэгний буудлыг зорин ирдэг болжээ. Tama-г ажиллаж эхэлснээс хойш анхны сарын үйлчлүүлэгчдийн тоо өмнөх сарынхаас 17 хувиар өссөн бол нэг жилийн дараа гэхэд урьд жилээс 10 хувиар өсөж маш сайн үзүүлэлттэй гарсан байна. Tama хэдийнээ уг буудлын нүүр царай болсон бөгөөд ажил хийсний хариуд түүнд элс болон сайн чанарын хоолоор шагнадаг байсан юм.
Уг муур 2007 онд жам ёсоороо таалал төгссөн бөгөөд 2010 онд өртөөний барилгыг дахин шинээр барихдаа муурын дүрстэй болгосон бөгөөд буудлынхаа нэрийг “Tama Densha” болгон өөрчилсөн байна.
