1937 оны 3-р сарын 18-ны өдөр АНУ-ын Texas мужид орших New London хэмээх зөвхөн баячуудын амьдардаг жижигхэн тосгонд байрлах New London ахлах сургуулийн байранд хүчтэй хийн дэлбэрэлт болсон байдаг. Тухайн үед тус сургуульд 500 сурагч, 40 багш байсан бөгөөд дэлбэрэлтийн улмаас 295 хүн амиа алдсан аж. Энэ явдал нь 20-р зуунд “сувдан эрэг”-ийн дараа орохоор үндэстнийг хамарсан томоохон эмгэнэлт явдал болон бүртгэгдсэн байна. Зөвхөн барилга, байгууламжийн хохирол гэхэд 1 сая доллараар хэмжигдсэн нь одоогийнхоор бол 17.9 сая доллартай тэнцэж байгаа юм.
1930 оноос эхлэн тус сургуулийн хэрэглээний хийг Parade Gasoline гэх компани нийлүүлж ирсэн байдаг. Дэлбэрэлтийн шалтгааныг яг баттай тогтоогоогүй ч тамхи, чүдэнз зэрэгтэй холбон тайлбарладаг байна. Нас барсан хүмүүсийн тоо эхний ээлжид 295 байсан ч хүмүүс эмнэлэгт хүргэгдэн нас барсаар 319 хүн амиа алдсан юм. Тус сургуулийн барилгаас ямар ч гэмтэл авалгүйгээр амьд гарч чадсан хүний тоо ердөө 50 хүрэхтэй үгүйтэй байсан бөгөөд Texas муж уг гамшигт бэлэн бус байсан тул Dallas-аас 100 сувилагч, 25 мэс засалчийн нэмэлт хүч илгээжээ. Түүнчлэн АНУ-ын агаарын хүчин, ойролцоо мужуудын цагдаагийн бие бүрэлдэхүүн нэмэлт хүчээр ирж орон даяар гашуудал зарлаж байв.
Гэвч хамгийн сонирхолтой нь уг аймшигт явдалд дэлхийн бусад улсуудын удирдагчид албан ёсоор харамсал огт илэрхийлээгүй байдаг. Харин гагцхүү тухайн үед Германы канцлерийн албыг хашиж байсан Адольф Гитлер цор ганцаар чинь зүрхнээсээ эмгэнэл илэрхийлсэн цахилгааныг АНУ-ын ерөнхийлөгч болон Texas мужийн амбан захирагчид илгээж байжээ. Өдгөө тус сууринд 987 хүн амьдардаг бөгөөд амьжиргааны түвшин нилээд дээгүүр бүс нутагт тооцогдсон хэвээр байгаа аж.
