Neerja Bhanot бол онгоцны үйлчлэгч бөгөөд Энэтхэгийн нэр алдартай загвар өмсөгч эмэгтэй байлаа. 1986 оны 9-р сарын 5-ны өдөр түүний үйлчилж байсан 365 зорчигчтой иргэний агаарын тээврийн хөлөг Пакистаны Карачигийн нисэх буудалд байхад нь зэвсэглэсэн этгээдүүд дайран онгоцыг барьцаалжээ. Тэд АНУ-ын иргэдийг сүрдүүлж засгийн газраас их хэмжээний мөнгө нэхэх зорилготой байлаа. Онгоц барьцаалаад хэдийнээ 2 цагийн хугацаа өнгөрсөн ч АНУ-аас ямар ч хариу ирээгүй л байв. АНУ алан хядагчидтай гэрээ хэлэлцээр тэр болгон хийгээд байдаггүйг ч террористууд бүгд сайн мэдэж байсан юм.
Харин тус онгоцонд нийт 44 Америкийн иргэн зорчин явж байсныг онгоцны үйлчлэгч бүсгүй нэгэнт мэдэж байсан тул тэрээр нууцаар бүх Америк иргэдийн паспортыг хурааж аван нууц газар далд хийн нуужээ. Иймд алан хядагчид Америкчуудыг устгаж эхлэх гэтэл хэн нь Америк хүн гэдгийг ялгаж чадалгүй төөрөгдөлд орсон байна. Тэдний ихэнх нь өөрсдийгөө Англи хүн хэмээн итгүүлж зарим нь мэддэг гадаад хэлээрээ ярин Франц, Герман хүмүүс болж жүжиглэн цаг нөхцөөж байлаа.
Онгоц барьцаалагдсанаас хойш 17 цаг өнгөрч байхад АНУ-аас алан хядагчидтай тохиролцоо хийхгүй, бууж өг үгүй бол бүгдийг устгана гэсэн л хариу ирсэн байна. Уурлаж хилэгнэсэн алан хядагчид тэсрэх бөмбөг суурилуулж эхлэх үед Neerja Bhanot онгоцны ослын шатыг дэлгэж хүмүүсийг зугтаалгаж эхэлжээ. Түүний үйлдлийг харсан алан хядагчид шат уруу гүйж буй 3 хүүг буудахаар онилох үед үйлчлэгч бүсгүй тэдний урдуур орж өмнөөс нь буудуулж амиа алдсан юм. Бүсгүйн аварсан 3 хүүхэд Америк хүүхэд байж таарчээ. Уг үйл явдлын дараагаар Neerja Bhanot бүсгүйн эрэлхэг гавьяаг үнэлж АНУ, Пакистан, Энэтхэг зэрэг улсууд цөм түүнийг эр зоригийн одонгоор нэхэн шагнасан байна.
