Ямар ч амьдралын ул мөр үгүй, амьдрал орших боломжгүй, дэлхийн хамгийн халуун бөгөөд хуурай там мэт газар бол Хойд Африк тивд орших 9 сая 200 мянган км хавтгай дөрвөлжин газрыг хамарсан сахарын цөл юм. Өөрөөр хэлбэл нутаг дэвсгэрийн хэмжээгээрээ АНУ-тай тэнцүү гэсэн үг. Жилийн 365 хоногт ганц удаа бороо орно, тэр бороо нь газарт унаад ус ердөө 1мм зузаан тогтов уу үгүй юу дээш хархад борооны үл ул мөргүй арилсан байна. Чухамдаа бол Сахар ийм л газар.
Гэхдээ энэ газар үргэлж ийм байсан гэвэл үгүй. Бүр тийм ч эрт үед энэ бүхэн болсон юм биш. Оюун ухаант хүн үүссэн цаг үед буюу одоогоос 6000 гаруй жилийн өмнө сахарын цөл нь нов ногоон байсан юм. Намаг, шалбааг ихтэй жилийн дийлэнх саруудад хур бороо ордог, төрөл бүрийн нуур, тэнгис, голууд бүрдсэн, бүр дэлхий дээрх хамгийн том цэнгэг уст нууртай жинхэнэ амьдрахад зориулсан газар байсан байна. Сахарын цөлөөс олдсон халим, загас, буга, хүн зэрэг маш олон төрөл зүйлийн амьтдын араг яс гэрчилж байгаа аж. Харин уг гайхамшигтай амьдрал тэтгэгч баян нутаг хуурай цөл болоход ердөө нэг зуухан жилийн хугацаа орсон байна. Тухайн нутаг дэвсгэрт амьдарч байсан хүн ардын дөнгөж хоёр дахь үе дээр л төрсөн нутаг нь нүдэнд дээр нь элсэн цөл болон дүрвэцгээхэд хүргэсэн юм. Үүний шалтгаан нь дэлхийн тэнхлэгийн өөрчлөлт хэмээн эрдэмтэд нотлоод байна. Угаас байгаль эхийн шийдвэр эргэлт буцалтгүй байдаг хойно.
Үүнийг Сахарын цөлд орших агуйн сүг зургууд гэрчилнэ. Нутгийн иргэд хурмаст тэнгэрээс хур бороо хүсэн залбирдаг байсныг гэрчлэх зургууд ихээр олдсон байна. Гэвч бурхан тэдний залбирлыг сонссонгүй. Борооны үүл нэгэнтээ Сахарыг орхисон байлаа. Иймд тус бүс нутгийн иргэд хойд зүгийг чиглэн дүрвэж эхэлсэн бөгөөд хойд зүгт орших үлэмж том Нил мөрөн хойд Африкийн амьдралыг тэтгэгч гол эх сурвалж нь болж байв. Мөн Сахарын нутаг элсэн цөл болж хувирсан нь хүн төрөлхтний түүхэнд дэвшилт болохуйц үйл явдал болсон гэж хэлж болно. Учир нь эх нутгаасаа Нил мөрнийг зорин дүрвэсэн ард түмэн хүн төрөлхтний анхны төрт улс болох Египетийн соёл иргэншлийн суурийг тавьсан гэж үздэг байна.
