Нэр жүжигчин, кино найруулагч, продюсер Sylvester Stallone-г танихгүй хүн дэлхий дээр өнөөдөр нэгээхэн ч үгүй биз ээ. Гэвч түүний амьдрал анхнаасаа огт дардам байгаагүй бөгөөд туйлын хүнд бэрх амьдрал, хатуу ширүүн цаг хугацааг туулж мөн ч их золиосыг гарган байж өөрийгөө өдий зэрэгтээ бүтээсэн эр хүн юм. 1946 онд АНУ-ын энгийн л нэгэн ядуу айлд төрсөн хүүхэд бусад ядуу хүүхдүүдийн адил 18 нас хүрч гэрээсээ яван хар ажил хийж, өдрийн хоолныхоо төлөө өнөөдрөөрөө амьдардаг нэгэн байлаа.
Хэдий амьдрал хатуу ширүүн байсан хэдий ч түүний дотроос хэзээ ч арилхааргүй, ямар ч цаг үед огт замхарч алга болох боломжгүй ганц туйлын хүсэл байсан нь дэлхийд алдартай жүжигчин болох мөрөөдөл нь байв. Гэвч бодит байдал дээр түүнд ямар ч боломж байхгүй байсан нь харамсалтай. Цаг хугацаа өнгөрсөөр 1969 онд болох нь тэр. Амьдрал өдөр ирэх бүрд дордсоор байсан тул өөрийнхөө хүүхэд байхаасаа тэжээж гэрээсээ хамтдаа явсан дэлхий дээрх өөрийнх нь цор ганц анд нөхөр болох “Butkus” хэмээх нохойг 40 доллараар зарсан байдаг. Тэрээр уг үйлдлээ нулимсаа тэвчиж байгаад хийсэн гэдэг. Гэхдээ тухайн үед үүнээс өөр ямар ч арга байгаагүй ажээ.
Хэн ч биш байсан гудамжны залуу болох Sylvester Stallone Холливуд гэх том айлд хүргэн орохын тулд хүсэл мөрөөдлөө орхилгүйгээр бүхий л аргаар тэмцэж, нүх сүв болгоноор чихсээр 1970 онд анхны кинондоо “The party at Kitty and Stud’s” гэх кинонд өдрийн 200 доллараар туслах дүрд хоёр хоног тоглосон байдаг. Уг явдлаас хойш мань эр кино найруулагчдад нүдлэгдэн нэлээд хэдэн кинонуудад туслах дүрээр тоглодог болжээ. Харин 1976 онд түүний гол дүрийг нь бүтээсэн Rocky кино барууны ертөнцөд шуугиан тарьж Sylvester Stallone ганцхан хормын дотор дэлхийн од болсон түүхтэй.
Гэвч энэ бүх хугацаанд тэрээр хэзээ ч өөрийнхөө үнэнч нөхөр болох “Butkus”-ыг мартаагүй юм. 1970 онд анхны кинонд тоглож 400 доллар аваад нохойгоо 200 доллараар нь буцаан худалдаж авахын хүссэн боловч өнөөх хүмүүс нь 1000 доллар нэхсэн байдаг. Ийнхүү ямар ч боломжгүй болсон тул 1972 онд дахин очиж 1000 доллараар авах гэтэл 2000 доллар нэхсэн аж. Харин мань эр 1973 онд өөрийн багийн найзыг 15,000 доллараар өөртөө эргүүлэн худалдаж авсан байдаг. Ийнхүү олон жилийн дараа уулзсан хоёр найзын нөхөрлөлийн бодит түүх эцэстээ жаргалтайгаар төгссөн нь гайхалтай.
