Энд өгүүлэх түүх бол хүн төрөлхтний түүхэнд ердөө ганц л удаа тохиолдож байсан маш өвөрмөц тохиолдол юм. Австри-Унгарын эзэнт улсын иргэн Adam Rainer нь амьд явах хугацаандаа одой хүн байж үзсэн бөгөөд улмаар аварга биетний амьдралаар ч амьдарч үзсэн байдаг. Энэ бүх түүх 1899 онд эхэлсэн бөгөөд ямар ч өвчингүй эрүүл саруул эхээс яг л бусдын адил жаал хүү мэндэлсэн байна. Гэвч цаг хугацаа өнгөрөхийн хэрээр нэг л зүйл биш байгааг эцэг эх нь анзаарсан аж. Хүү 1918 онд 19 настайдаа цэргийн үзлэгээр өндрөө хэмжүүлж үзтэл ердөө 1метр 15 см гэж гарсан байна. Гэвч тухайн цаг үед Австри-Унгарын эзэнт гүрэн дайнд ялагдал хүлээх нь ердөө цаг хугацааны асуудал байсан тул түүнийг цэрэгт татжээ. Хэрэв насанд хүрсэн хүн 147 см-аас доош өндөртэй байвал тухайн хүнийг одой гэж үздэг аж.
Түүний бие хэдийгээр жижигхэн байсан ч алга нь яг л энгийн хүнийх шиг том байсан гэдэг. Adam Rainer-ыг дайнд явснаас хэдхэн сарын дараа дайн дуусч эзэнт гүрэн бутран унасан байдаг. Энэ явдлын дараа Австри улс өөрийн хөгжил цэцэглэлтийн замыг сонгож энх тайван амьдрал ирснээр одой залуу ч бусдын адил энгийн амьдрах болж. Гэвч тухайн үед хүний бие организмыг судалдаг, шинжлэх ухаанд амиа өгөхөөс буцахгүй Mandl болон Windholz гэх эрдэмтэд түүнтэй уулзаж түүний биед нарийн шинжилгээ хийсэн байна. Үүний үр дүнд эрдэмтэд одой эрд бусад хүмүүс шиг ердийн хэмжээтэй болох боломж бүрэн байгаа бөгөөд хэрэв өөрсдөд нь мэс ажилбар хийхийг зөвшөөрвөл хэмээн санал тавьсан байдаг. Adam Rainer ч татгалзах зүйлгүй зөвшөөрсөн түүхтэй.
Ийнхүү мэс засал амжилттай болсон боловч сөрөг нөлөө нь Adam Rainer сонсголоо бага зэрэг алдаж нэг нүд нь сохорсон байна. Гэвч тэрээр өсөж эхэлжээ. Ийнхүү түүний өсөх процесс тасралтгүй үргэлжилсээр 1932 онд 33 настайдаа гэхэд 218 см болтлоо өссөн байлаа. Эрдэмтэд түүний өсөлтийг зогсоож чадахгүй болсон бөгөөд нэгэн цагт одой байсан эрд унтах ор ч олдохоо больжээ. Үүнээс болж нийгэм даяар түүнийг аварга биетэн хэмээн дуудаж тун ч их сэтгэл гутралд орсоор 1950 онд 51 насандаа хорвоогийн мөнх бусыг үзүүлсэн байна. Түүнийг үхэх үед цогцсыг нь хэмжин үзэхэд 237 см хүрсэн байдаг.
