Дэлхийн хоёрдугаар дайны үед Германы агаарын дайралтаас хамгаалах үүднээс Их Британы зүүн эргээс 12 км-ын зайтай газарт 3 ширхэг өндөр цамхаг босгосон байдаг. Ийнхүү дайн дуусч уг цамхгууд ч бүрэн бүтэн үлдсэн тул 1967 онд Их Британы армийн байлдагч хийгээд радио холбооны оператораар ажиллаж байсан Roy Bates гэх эрхэм нэг цамхгийг нь өөрийн болгож тусгаар тогтнолоо зарлан “далайн арлын эрх мэдэл” хэмээх нэр бүхий улс байгуулсан байна. Мөн 1975 онд уг цамхгийг зөвхөн тусдаа үндэстэн амьдардаг хэмээн баталгаажуулж өөрийн гэсэн туг, логог ч зохиосон аж.
Гэвч тус улс нь НҮБ-д хүлээн зөвшөөрөгдөхийн тулд Их Британи болон Герман улсуудаар нэн тэргүүнд хүлээн зөвшөөрөгдөх ёстой байв. Гэвч НҮБ-ын далай тэнгисийн тухай конвенцод усан дээр барьсан байгууламжийг арал гэж үздэггүй тул уг цамхгийг арал гэж үзээгүй байна. Иймд тусгаар тогтнох ямар ч боломжгүй болсон юм. Мөн 1978 онд арлын удирдагч Roy Bates-ыг гэр бүлийн хамт Их Британи явсан хойгуур арал дээр үймээн самуун дэгдэж Alexander Achenbach гэх эр бүх эрх мэдлийг өөртөө шилжүүлсэн байна. Хожим түүнд 35,000 доллар төлж байж өөрийн арлыг буцааж авсан бөгөөд Roy Bates Их Британи, Герман зэрэг холбоотон улсуудаас цэрэг зэвсгийн тусламж хүссэн боловч оронд нь тус мөнгийг өгсөн байдаг.
Тухайн үед тус арлын иргэн бүр өөрсдийн гэсэн гадаад паспорттай бөгөөд Европын улсууд уруу визгүй зорчдог байжээ. 2012 оны 10-р сард арлын захирагч Roy Bates 91 насандаа таалал төгссөн тул түүний хүү Michael бүх эрх мэдлийг авсан байдаг. Харин 2006 оны 6-р сарын 23-ны өдөр тус улсад цахилгааны гэмтлийн улмаас гал гарсан тул хүмүүс нь аврах завинд суун зугтаж завь хүрэлцээгүйн улмаас нэг хүн арал дээр үлдсэнийг Их Британы эргийн хамгаалалтын албаныхан нисдэг тэргээр очиж аварсан түүхтэй. Энэ явдлаас хойш тус арлын бүх иргэдийн паспортыг хурааж авсан бөгөөд эцгийнхээ үхлээс нэг их удалгүй түүний хүү 2016 оны 3-р сарын 10-ны өдөр нас барсан байна. Өнөөдөр тус арал нь албан ёсоор Их Британы засгийн газрын өмч бөгөөд Испанийн үл хөдлөх хөрөнгийн компани уг цамхгийг 600,000 доллараар худалдаж авахаар ярилцаж байгаа гэнэ. Гэвч арлын иргэд одоог хүртэл өөрсдийгөө тусгаар улс, тусдаа үндэстэн хэмээн итгэсээр байдаг аж.
