Виттьер тосгон нь АНУ-ын Аляаска мужид нийслэл хотоосоо 100 орчим км зайтай орших нэгэн жижигхэн суурин аж. Уг тосгоны хүн ам тун цөөн, тодруулбал 2016 онд авсан хүн амын тооллогоор 2014 иргэнтэй гэсэн мэдээлэл гарсан байдаг. Тосгоны эдийн засгийг бүрдүүлдэг гол субьектууд нь өмнө зүгт орших жижигхэн загас агнуурын боомт болон хэд хэдэн нефтийн ордууд юм. Гэвч энэ бүхэн хамгийн сонирхолтой нь биш аж, хамгийн сонирхолтой зүйл нь тухайн тосгоны иргэдийн 85 хувь нь цөм нэг байшинд амьдардаг байна.
Тосгонд албан ёсны болон албан бусаар 200 гаруй өрх тогтмол суурьшдаг гэх боловч эдгээр өрхүүдийн 170 гаруй нь төв талбайн зэргэлдээ орших аварга том орон сууцанд амьдардаг аж. Мөн уг орон сууцны доод 3 давхарт нь 14 төрлийн хүнс болон өргөн хэрэглээний бүтээгдэхүүний дэлгүүрүүд, шуудангийн газар, үсчин, эмнэлэг, цагдаагийн газар зэрэг улсын байгууллагууд ч байрладаг юм. Харин тосгоны сургууль нь байшингаас гараад 40 алхмын зайтай байдаг байна.
Түүнчлэн уг барилгад нь 15 өрөө бүхий зочид буудал байрладаг нь хамгийн хачирхалтай. Жуулчид энэхүү өвөрмөц тосгонд очин зочид буудалд нь байрлаж бяцхан нийгмийн нэгэн хэсэг болдог байна. Цас их орж эрс хүйтэрсэн өвлийн улиралд тосгоны иргэд уг барилгаас огт гаралгүй байшин дотроо дэлгүүр хэсэж бүх хэрэгцээгээ бүрдүүлэн амьдардаг юм. 1960 он хүртэл тус тосгоны ганц өндөр барилгыг АНУ-ын цэргийн зориулалтаар ашиглаж байгаад суурьшил нэмэгдсэний дараа цэргийн ангийг татан буулгаж орон сууц болгосон байдаг.
