Флоренс Найтингейл “Гэрэл барьсан эмэгтэй” хэмээн олонд танигджээ. Яагаад ингэж нэрлэгдсэн юм бол? Флоренс Найтингейл бол 1820 онд Италид, чинээлэг гэр бүлд төрсөн англи эмэгтэй юм. Түүнийг Флоренс хотын нэрээр нэрлэжээ. Бараг 200 жилийн өмнө зөвхөн ядуу хүмүүс л цэвэрлэгээ хийж, бусдыг асарч сувилдаг байлаа. Харин Флоренс бусад чинээлэг хүмүүсээс тэс өөр. Амьдрал бүхэлдээ аз жаргал байдаггүй гэдгийг тэр мэддэг байв.
Тэр нийгмийн үйл ажиллагаанд оролцдог, бусдыг энэрч халамжилдаг хүн байсан төдийгүй сувилагч болохоор эргэлт буцалтгүй шийджээ. 1854 онд Их Британи, Франц, Турк улсууд Оростой дайтаж байв. Энэ дайныг Крымийн дайн гэж нэрлэдэг. Өдөр бүр олон цэрэг шархдах боловч армийн эмнэлэгт ажиллах сувилагч бараг л байсангүй. Харин Флоренс болж буй үйл явдалд сэтгэл зовсоор шархадсан цэргүүдийг асрах боломж олдмогц л Туркийн Сцютари хот руу явжээ. Турк улсад очоод, олон хүн шахцалдсан, бохир эмнэлгийг хараад цочирдсон тэрээр эмнэлгийн өрөө тасалгаа, өнцөг булан бүрийг цэвэрлэж, дэвсгэр даавуунуудыг угааж, эрүүл хоол хийгээд зогсохгүй бичиг үсэг мэддэггүй цэргүүдэд захиаг нь бичиж тусалж байжээ.
Флоренс бараг унталгүй, цаг үргэлж ажиллаж байв. Шөнө болохоор гэрэл барин өвчтөнүүдийг эргэж тойрдог байсан аж. Тиймээс л хүмүүс түүнийг “Гэрэл барьсан эмэгтэй” гэж нэрлэх болжээ. Хожим нь тэрээр Лондонд сувилагчийн сургууль нээсэн юм. Түүнийг орчин цагийн сувилахуйг үүсгэн байгуулагч гэж үздэг. Түүний хичээл зүтгэлийн үр дүнд эмнэлгийн орчин нөхцөл өмнөхөөсөө цэвэрхэн болж, сувилагч гэдэг мэргэжил илүү эрхэм хүндтэй бас нарийн үүрэгтэй болсон билээ. Өнөөдрийн гайхалтай сувилагчдыг бий болгож өгсөн түүнд баярлалаа. Бидний мэдээ таалагддаг бол таалагдсан нийтлэлээ хаа нэг шэйр хийн дэмжиж байгаарай.
