Уг гайхалтай эр АНУ-ын Атланта хотын уугуул бөгөөд 1993 онд Мичиганы анагаах ухааны их сургуулийг мэдрэлийн мэс засалч мэргэжлээр төгссөн юм. Тэрээр бага байхаасаа сэтгүүлч болохыг хүсдэг байсан тул 1995 онд олон улсын хэвлэлийн CNN агентлагт анагаах ухааны сэтгүүлчээр ажилд оржээ. Өөрөөр хэлбэл эмч мэргэжлээр төгссөн цагаасаа хойш огт эмчээр ажиллалгүй сэтгүүлч болсон хэрэг. Түүнийг ихэвчлэн Африк болон хөгжил буурай орнуудын анагаах ухаан, нийгмийн хүн ардын эрүүл мэндийн тухай сурвалжлага, нэвтрүүлэг бэлтгэхээр явуулдаг байв.
2006 онд АНУ Иракт байлдааны ажиллагаа хийж байх үед Иракийн хүүхдүүдийн эрүүл мэнд, тус улсын эм хангамжийн нөөцийн тухай тусгай сурвалжлага хийлгэхээр CNN агентлаг түүнийг илгээсэн байна. Тэднийг АНУ-ын тэнгисийн цэргийн 1-р багийнхан хамгаалж явсан бөгөөд Кабул хотын ойролцоо явж байхад гэнэт тэсрэх бөмбөг дэлбэрснээс болж тэргүүн эгнээнд явж байсан Жесүс Видана гэх цэрэг толгойдоо хүнд гэмтэл аван ухаан алдсан аж. Цэргийнхэн байдлыг хяналтандаа авсны дараа тэдэнд толгойд мэс засал хийх эмч байхгүй бөгөөд хугацаа алдвал уг цэрэг амиа алдаж мэдэхээр нөхцөл байдал үүсэв.
Иймд 13 жилийн өмнө мэдрэлийн мэс засалч мэргэжлээр төгссөн боловч ганц ч удаа мэргэжлээрээ ажиллаагүй Санжая Гупта гэх CNN-ы сэтгүүлчээс тэд тусламж гуйжээ. Түүнд огт эмнэлгийн багаж хэрэгсэл байгаагүй боловч цаг алдаж болохгүй байсан тул цахилгаан өрөм ашиглан толгойг нь нүхэлж мэс засал хийсэн байдаг. Уг мэс засал 3 цагийн турш үргэлжилсэн бөгөөд толгойд зоогдсон хэлтэрхийг нь гарган авч түүнийг цэргийн нэгдсэн эмнэлэг уруу хүргэсэн юм. Шархадсан цэрэг уг сэтгүүлч, эмч эрийн ачаар амьд үлдэж чадсан бөгөөд 2013 онд АНУ-ын ерөнхийлөгч асан Барак Обама түүний эр зориг, ур чадварыг үнэлэн цагаан ордонд шагнал гардуулж байжээ.
