Уг муурыг “Миав” гэх бөгөөд түүний эзэн нь 2010 онд бяцхан муужгай байхад амьтны дэлгүүрээс худалдан авч гэртээ авчирж байжээ. Тэр цагаас хойш муураа тун их эрхлүүлж бүхий л амттай, шимтэй хоолоор бордсоны улмаар муур нь хэт таргалан залхуу болж эхэлжээ. Улмаар түүний муур огт хөдлөхөө больсон бөгөөд зөвхөн хоол идэх, хүндрэх үедээ л маш удаанаар хөдөлдөг болсон байна. Түүний хэтэрхий таргалалтыг эзнийх нь хөршүүд шүүмжлэн хоолны дэглэм барих хэрэгтэй гэж зөвлөсөн боловч эзэн нь энэ бүхнийг үл тоон хүслээр нь байлгасаар байв.
2012 оны нэгэн өдөр түүнийг эзэн нь жинлэж үзэхэд тэрээр 18 кг жин татсан байна. Улмаар түүний муур алхаж чадахаа болин зөвхөн эзнээрээ зөөлгөдөг болох нь тэр. Байдал нэгэнт ийнхүү хүндэрсэн тул 87 настай эзэн нь муураа ч дийлэхээ больж тэжээх аргагүй болжээ. Иймд орон нутгийн муурны асрамжийн газарт хандан өөрийн хайртай муураа өгсөн байна. Тэнд мэргэжлийн хүмүүс олон төрлийн шинжилгээ авсан бөгөөд хөдөлгөөний дутагдал болон хэт их хоолноос болж чихрийн шижинтэй болсныг тогтоосон аж.
Мэргэжлийн мал эмнэлгийн эмч нар түүнийг яаралтай тураахгүй бол зүрх судасны өвчин үүсэх магадлал өндөр байгаа тухай анхааруулжээ. Иймд “Миав” муурыг тураах тусгай хоолны дэглэм гаргасан бөгөөд өдөр болгон тогтмол дасгал хийлгэхээр болсон байдаг. Түүнийг 2012 оны 4-р сарын 30-ны өдөр асрамжийн газарт хүргэж мөн оны 5-р сарын 5-ны өдөр хүртэл тусгай тураах дэглэмээр хооллосон боловч бүх зүйл нэгэнт оройтсон байлаа. Муур хэтэрхий таргалалтаас болж амьсгалахад хүндрэлтэй болон улмаар зүрхний өвчнөөр нас баржээ. Түүнийг нас барсны дараа жинлэж үзэхэд жин нь яг хивэндээ буюу 18 кг байсан юм.
