Түүнийг Галварино гэх бөгөөд 16-р зуунд төв Америкийн Мапучи овгийн эрэлхэг тулаанч эр байсан юм. Түүний эр зоригийг зөвхөн овог аймгаар нь тогтохгүй Испаны эзлэн түрэмгийлэгчид хүртэл өндрөөр үнэлэн түүнээс айж эмээдэг байлаа. Үүний илэрхийлэл болж 1557 оны 11-р сарын 8-ны өдөр Мапучин овог Испаны эсрэг тулалдан ялагдаж 150 гаруй эрчүүдийг олзлон бүх энгийн цэргүүдийн баруун гарыг нь тастсан байдаг. Харин Галварино зэрэг цэргийн дарга хүмүүсийн хоёр гарыг хамтад нь тастсан аж. Нэгэнт түүний хоёр гар байхгүй тул тулалдах чадваргүй болсон хэмээн үзэж сул тавин явуулсан байдаг. Энэ нь түүний хувьд маш том доромжлол бас бассан үйл явдал болжээ.
Дайн 1550 оноос эхэлсэн бөгөөд Мапучи овог зэвсгийн хүч дутуу боловч хүний илүүгээр эх нутгаа хамгаалахын төлөө амь хайргүй тулалдаж байв. Хоёр гараа алдсан цэргийн дарга өөрийн овог дээр ирж захирагчийнхаа өмнө уйлан дахиж тулалдмаар байгаагаа хэлсэн байдаг. Түүний захирагч эр зориг хийгээд асар их сэтгэлийг нь өндрөөр үнэлж хоёр гарт нь хурц үзүүртэй урт хутга хийн бэхэлж өгсөн аж. Ийнхүү тэрээр ямар ч сэлэм эсвэл хутга барих шаардлагагүйгээр шууд л тулалдах боломжтой болсон юм.
1557 оны 11-р сарын 30-ны өдөр ээлжит томоохон тулаан болж Мапучи овог 3000 дайчдаа илгээж хамгийн орчин үеийн зэвсгээр зэвсэглэсэн 1500 гаруй Испаничуудын эсрэг тулалдсан байдаг. Уг тулаанд Мапучи овог гутамшигтайгаар ялагдсан бөгөөд Испаны талаас нэлээд тооны адуугаа алдсан боловч огт хүний хохирол амсаагүй юм. Энэ бүхний шалтгаан нь ердөө л алсын тусгалтай их буу байжээ. Түүнийг олзолсон Испаны цэргийн удирдагч эр зоригийг нь үнэлж өөрсдийн талд нэгдэн тулалдан санал тавьсан аж. Гэвч эх орон, ард түмэндээ бүхнээс илүү хайртай эрэлхэг эр Галварино уг саналыг нь хүлээж авалгүй үхлийг сонгосон байдаг. Уг явдлаас хойш Мапучи овог тийм ч амар бууж өгөлгүй тулалдсаар 1880 онд бүрэн ялагдсан түүхтэй.
