Энэ бүх түүх дэлхийн нэгдүгээр дайны он жилүүдэд болж өрнөсөн юм. Уг дайн нь Бельгийн эзэн хааны нэр хүндийг тултал нь өсгөж үндэстний баатрын хэмжээнд хүргэсэн байдаг. Учир нь 1914 оны 9-р сард Германы эзэнт гүрний хаан Велхилм II Францыг эзлэхийн тулд Бельгийн нутгаар нэвтрэн Ясир голыг гаталж орох нь хамгийн дөт бөгөөд амар зам байлаа. Энэ ч утгаараа Бельгийн эзэн хаан Альберт I-т хандан уг хүсэлтээ илэрхийлэхэд Бельгийн хаан эрс эсэргүүцэн “Бельги бол улс болохоос зам биш” хэмээн хатуу хариу хэлсэн байдаг. Ийнхүү Герман улс Бельгийн эзэлж цааш явахаас өөр сонголтгүй болсон тул тухайн ондоо багтаан асар их цэргийн хүчээр Бельгийн нутагт цөмрөн орсон юм.
Бельгийн эзэн хаан Альберт I улс үндэстнийхээ бүхий л хүчийг шавхан Ясир голын эрэгт цэргүүдээ бөөгнүүлэн нэгдсэн хамгаалалт босгон Германы хүчирхэг армийн эсрэг тулалдав. Тулалдаан хэтэрхий удаан үргэлжилж Бельги улс асар их хохирол амсан сэтгэлзүйн хувьд гүн уналтад оржээ. 1916 он гэхэд Бельги улс газар нутгийнхаа 90 хувийг Германчуудын гарт алдсан боловч Ясир голын бүс нутгаа хориглон хамгаалж тэссээр байв. Эзэн хаан Альберт I өөрийн биеэр Ясир голд очин цэргүүдээ удирдан хамтдаа галын шугамд тулалдаж байсан бол хатан Элизабет нь цэргийн эмнэлэгт сувилагч хийж байлаа. Бүр өөрийн 14 настай төрсөн хүүгээ хүртэл Ясирт авиран цэргийн цол олгон тулалдуулсаар байсан аж.
Эзэн хааных нь хийсэн үйлдэл цэргүүдтийнх нь үндэсний үзлийг сэргээж ард түмэн нь түүнийг хайрлан шүтэж эхэлсэн байна. Улмаар түүнийг үндэсний баатар болгон холбоотон гүрнүүдийн анхааралд ч өртөж эхэлжээ. 4 жилийн турш Ясир голд хориглон тулалдсаны эцэст дайн дуусч, үүнтэй зэрэгцэн энх тайван цаг айлчилж алдсан бүхий л газар нутгуудаа эргүүлэн авсан юм. Бельги улс бүхий л хүчээрээ хориглон тулалдсан тул Германчуудын Францыг эзлэх ажиллагаа удааширч дайны өрнөлд маш онцгой ач холбогдол үзүүлсэн байдаг. Дайны төгсгөлийн он жилүүдэд Бельгид туслахаар Франц болон Их Британы цэргийн эвсэл хүрэлцэн ирж тэднийг Бельгийн эзэн хаан Альберт I удирдан тулалдсан аж.
