Энэ бүх үйл явдал тэртээх 1858 оны намрын нэгэн өдөр эхэлсэн түүхтэй. Их Британы хойд нутаг буюу Шотландын Эдинбург шилтгээнд амьдрах цагдаагийн ажил хийдэг Жон Грей нэгэн хөөрхөн гөлөгийг үрчилж аван түүнийг хайрлан халамжилж амьдрах болжээ. Цаг хугацаа ч өнгөрч гөлөг том болсоор бие биедээ ухаангүй дасан 3 жил өнгөрчээ. Нохойг Бобби гэж дуудах бөгөөд түүний эзэн нь цагдаа тул ихэвчлэн шөнийн манаанд гардаг байж. Яг л урьд урьд өдрүүдийн адил түүний эзэн орой болох үед ажилдаа явахаар нохойгоо илээд гарсан боловч хэзээ ч эргэж ирээгүй юм. Шөнийн манаанд гарч байхдаа гэмт хэргийг таслан зогсоохоор муу хүмүүстэй муудалцах үед түүний цээжинд хэн нэгэн нь хутга дүрэн амийг нь хөнөөсөн байв.
Цагдаагийн албан хаагч албан үүргээ гүйцэтгэж байгаад нас барсан тул түүний гэр бүлийнхэн хийгээд байгууллагынхан нь нийлэн нэр хүндтэйгээр Грейфайрс хэмээх төрийн албан хаагчдын оршуулгын газарт оршуулжээ. Оршуулгын ёслол дээр мэдээж түүний дотно гэсэн бүхий л хүмүүс ирсний дотор 3 настай хайртай Бобби гэх нохой нь ч мөн ирсэн байна. Бүх үйл ажиллагаа дууссаны дараа Жон Грейн эхнэр нохойг авч явах гэсэн боловч тэрээр огт явалгүй эзнийхээ шарилын дэргэд үлдэж хоцорчээ. Бүтэн өдөржин нохойг авч явах гэж хичээсэн ч огт хөдлөөгүй тул түүнийг үлдээхээс өөр аргагүй болсон байна. Маргааш нь нохойгоо авахаар иртэл яг л нас барсан эзнийхээ хажууд ямар ч хөдөлгөөнгүй байсаар байжээ. Урьдын адил хамт харьсангүй. Түүний сэтгэлд байсан сайхан бүхэн эзэнтэйгээ хамт авсанд орсон мэт.
Цаг хугацаа эхэн үедээ сар сараар өнгөрсөөр улмаар жил жилээр одох нь тэр. Бобби нохой яг л өөрийн байсан байрандаа байсаар. Эдинбург хотын иргэд түүнийг нэгэнт бүгд мэдэх болж ард иргэд түүнийг зорин очиж хоол өгдөг болжээ. Уг нохойны тухай мэдээ язгууртан Виллиам Чамберс, лорд Провост зэрэг ноёдын сонорт хүрч тэд ч газар дээр нь очин нүдээрээ үзэж түүнийг эрхлүүлэн амттай хоол өгдөг болов. Тэрээр тасралтгүй 14 жилийн эзнийхээ шарилын дэргэд амьдарсаар 1872 оны 1-р сарын 14-ны өдөр жам ёсоороо хорвоог орхисон юм. Түүнийг хотын удирдлагаас эзнийх нь дэргэд Грейфайрс төрийн албан хаагчдын оршуулгын газарт оршуулсан байна.
