Уг эрийг Карлес Ресио гэх бөгөөд Испани улсын Валенсиа мужийн иргэний бүртгэлийн газарт архивын хэлтсийн захирал хийдэг нэгэн аж. Карлес анх 2004 онд хэлтсийн захирал болсон боловч 2008 оноос хойш тэрээр огт ажлын байран дээрээ харагдахаа больжээ. Зарим чухал үеүдэд түүний гарын үсэг хэрэг болвол өөрийн туслахаараа гарын үсгээ дуурайлган зуруулаад явдаг байж. Испани улсад төрийн албан хаагчдын ажлын цаг нь өглөөний 7:30-16:00 цаг хүртэл байдаг бөгөөд Карлес бас яг ч ажлын байран дээрээ огт ирдэггүй гэвэл үгүй аж. Тэрээр ажлын өдрүүдэд тогтмол өглөөний 7:30 болон оройн 16:00 цагуудад ажил дээрээ ирж ирцээ бүртгүүлээд буцаад явдаг байна.
Гайхалтай нь энэ байдал 2008-2018 оны хооронд буюу бүхэл бүтэн 10 жил үргэлжилсэн байна. Түүнтэй хамт ажилладаг зарим албан хаагчид түүний царайг нь бүр мартсан тухайгаа хэлжээ. Ажлаа огт хийдэггүй боловч цалингаа бүтэн авдаг нь бусад шударга хүмүүсийн дургүйцлийг хүргэдэг тул тэд олон жилийн турш гомдол мэдүүлсэн ч дээд байгууллагаас асуудлыг огт шийдэж байгаагүй гэнэ. Гэвч 2018 оны 7-р сарын 12-ны өдөр тус улсын хууль зүйн сайдын сонорт уг явдал хүрснээр газар дээр нь ажлаас халах тушаал гаргаж 44 мянган еврогийн мөнгөн торгууль оногдуулсан байна. Мөн түүний хэргийг захиргааны хэргийн шүүх уруу шилжүүлжээ.
Чухам яагаад түүнийг ажилдаа огт ирдэггүй байсан талаар асуухад уг эр өөрийгөө илүү чухал ажил амжуулдаг байсан гэж хэлжээ. Тэрээр хүүхэд байхаасаа зураг зурдаг туйлын уран бүтээлч сэтгэхүйтэй нэгэн байсан тул уг сонирхлын дагуу Испаны томоохон комик номын газарт зураачаар давхар ажилладаг байж. Түүний уг үйлдэл нь Испаны төрийн албаны тухай хуулийг ноцтой зөрчиж байгаа тул нэмж төлбөрт унаж ч магадгүй байгаа юм. Мөн бүхэл бүтэн 10 жилийн турш ажил дээрээ очоогүй эрийг яагаад дарга нар нь халах эсвэл хариуцлага тооцдоггүй байсан нь одоогоор тодорхойгүй байгаа аж. Магадгүй хэн нэгэн нөлөө бүхий хүний ивээл доор байдаг байсан байж болох юм хэмээн Валенсиа мужийн иргэд хоорондоо түүний тухай ярилцдаг байна.
