Техас мужийн нутагт орших нийтийн усан санд бүх зүйл хамгийн аз жаргалтайгаар эхэлж байсан боловч 29 настай хөөрхий залуугийн хувьд энэ бүх жаргал нь тун удахгүй үхлээр солигдоно гэж хэн мэдэх билээ. Өнгөрсөн сарын 21-ны өдөр Фабризио Стабил хэмээх Техас мужийн оршин суугч эр маш ховор тохиолдох боловч сүүлийн үед давтамж нь ихсэж буй тархи идэгч шимэгч болох “найглера”-ын халдвар аван амиа алджээ. Анх 9-р сарын 16-ны өдөр түүний толгой өвдөж эхэлсэн тул тэрээр эм уугаад унтсан байна. Харин маргааш нь уг эр орноосоо босож чадахгүй байсан бөгөөд ярихад хүртэл ихээхэн хүндрэлүүд үүсжээ. Тухайн өглөө түүнийг түргэн тусламжийн албан хаагчид гэрээс нь эмнэлэгт хүргэж бүх шинж тэмдгүүдийг нь судалж олон тооны шинжилгээ хийж үзсэн байна.
9-р сарын 20-ны өдрийг хүртэл эмч нар түүнийг минингет халдвар авч хүндэрсэн тул ийм байдалд хүрлээ гэж үзсэн ч нарийн шинжилгээгээр “найглера” халдвар авсан нь тогтоогдсон байна. Тухайн цаг үед бүх зүйл хэтэрхий оройтсон байсан тул маргааш нь буюу 9-р сарын 21-ны өдөр нас баржээ. АНУ-ын халдварт өвчний хяналтын төвөөс гаргасан мэдээллээр бол уг бактери нь халуун температуртай цэнгэг ус тухайлбал нуур болон голын халуун усанд агуулагдаж байх боломж их байдаг гэнэ. Уг бактери нь хүний хамраар дамжин биед нэвтэрч улмаар тархинд очин шимэгчилж эхэлдэг байна. Хэрэв нэгэнт вирусийг биедээ нэвтрүүлсэн бол түүнээс урьдчилан сэргийлэх ямар ч арга зам байдаггүй аж.
Өмнө нь АНУ-д уг вирус нэлээд хэдэн удаа тохиолдож байсан бөгөөд сүүлд 2016 онд 18 настай Лаурен Сейтз гэх охин Өмнөд Калифорни мужийн нийтийн усан сангаас уг халдварыг авч амиа алдсан бол Флорида мужид Сибастиан Делеон гэх охин гайхамшигтай тохиолдлоор уг халдвараас амьд үлдэж чадсан байна. Хамгийн анх уг халдвар 1962 онд Диснейн усан сангаас илэрч байсан тухай тэмдэглэгдсэн байдаг. Түүнчлэн сонирхолтой нь гэвэл Стабилыг халдвар авдаг үед тухайн усан санд байсан өөр нэг ч иргэн халдвар аваагүй юм. Уг халдвар авсан хүмүүсийн 97 хувь нь амиа алддаг гэх судалгаа бий бөгөөд 1962-2017 оны хооронд 143 хүн АНУ-д халдвар авснаас ердөө дөрвөн хүн л гайхамшигт тохиолдлоор амь аврагдсан байна.
