1940 оны 4-р сарын 17-ны өдөр Их Британы нисэх хүчний онгоц Норвеги улсын алс бөглүү Гротил тосгоны ойролцоо нисэж байх үедээ Германы нисэх хүчний онгоцтой таарчээ. Тэд агаарт хөөцөлдсөн тулалдаан хийсний үр дүнд хоёул бие биенээ оносон байна. Эхэнд Германы онгоц оногдсон ч нисгэгч нь амьд байсан тул онгоцоо арай ядан залуурдсаар аль болох зөөлхөнөөр газарт буулт хийжээ. Багийн бүрэлдэхүүнийг шалгаж үзэхэд тэднээс ердөө Хорст Шопис, Жосеф Шварц, Волфганг Странг гэсэн гурван хүн л амьд үлдсэн байв. Шөнө дунд цасан шуурга болж буй Норвегийн хөдөө талд тэд чухам хааш явж хэрхэн амьд үлдэхээ мэдэхгүй байсан боловч ямартай ч байгаа газраасаа хөдлөхгүй бол тэд цөм осгож үхнэ гэдгээ л мэдэж байлаа. Иймд гурван нисгэгч харсан зүгтээ алхаж эхлэв.
Тэд ойролцоогоор 1 цаг гаруй алхсаны дараа хаа нэгтээ гал гарч буйг цасан шуурган дундаас олж харжээ. Харсан даруйдаа бүх чадлаараа тийш гүйн очиход ямар нэгэн тосгон бус харин тэднийг унагасан Их Британы нисэх онгоц байх нь тэр. Ахмад Чарлес Дэвинпорт болон Роберт Смит нар Герман цэргүүдийг хараад гар буугаа гаргахад тэд ч өөдөөс нь буугаараа онилсон байна. Гэвч нөхцөл байдал үнэн хэрэгтээ Герман ч бай Англи ч бай хүн гэдэг утгаараа энэ аймшигт хүйтэн л тэдний хувьд ганц бодит аюул байв. Иймд Герман болон Английн цэргүүд хоорондоо тохиролцон энэ хүнд нөхцөл байдлаас хамтдаа гарахын тулд нэг тал болон ажиллахаар болсон аж.
Эхэн үедээ бие биедээ итгэж чадахгүй байсан ч цаг хугацаа өнгөрөхийн хэрээр эрчүүд нэг нэгэндээ итгэж эхэлжээ. Тэд хамтдаа ан хийж, гал түлэн амьдралаа хоорондоо ярьцгааж яг л дайснууд бус найз нөхөд мэт болов. Ойролцоогоор 20 гаруй хоногийн дараа тэд урц олсон бөгөөд ашгүй хүнтэй таарлаа гэж бодтол уг урц нь хоосон байв. Иймд тэд ямартай ч хоноглох газартай болсондоо баярлан анд явж ирээд хоолоо хийхээр бэлдэцгээж байлаа. Их Британы хоёр цэрэг дотор бугын арьс өвчиж хажууд нь хоёр Герман цэрэг мөн л өөр бусад ажил хийж байлаа. Харин энэ үед Волфганг Странг тогоо авахаар гадагш гартал гэнэт буун дуу гарч тэрээр газарт унах нь сонсогдох. Цэргүүд цөм айдаст автаж урц дотор хэрхэх тухай ярилцаж байтал Их Британы хоёр цэрэг өөрсдийнх нь талынхан ирсэн тул Герман хувцастай хүнийг буудчих шиг боллоо хэмээгээд тэд Германы хоёрыг дотор үлдээгээд гарчээ.
Гэтэл гадаа Их Британы цэргүүд бус Норвегийн армийн хилийн цэргүүд байсан байна. Урцын эзэн Герман хувцастай хүмүүсийг харсан даруйдаа хилийн цэргүүдэд мэдэгдсэн тул тэд шууд л Германчуудыг устгахаар иржээ. Гэвч Их Британи цэргүүд болсон бүх явдлыг тайлбарлаж өгсний үр дүнд амьд үлдсэн хоёр Германыг хөнөөлгүй үлдээж тэднийг Канад дахь цэргийн хорих лагерь уруу илгээсэн байна. Харин Их Британы хоёр цэрэг эх нутагтаа буцан очоод дараагийн даалгавартаа гарчээ. Хоёр Герман нисгэгчийн хувьд тэд 1947 он хүртэл Канадад хоригдож байгаад баруун Германд очин амьдрах болов. Уг түүхээс сэдэвлэж Холливууд 2012 онд “Into the white” хэмээх кино бүтээжээ.
