Түүнийг харагдах байдал, хийдэг ажлаас нь шалтгаалан нийгэмд зарим хэсэг нь “цээрлүүлэг” “цаазлуулагч” эсвэл бүр “гахай” хэмээн хочилдог байлаа. Ямартай нь ганц үнэн гэвэл тэрээр тухайн цаг үедээ цусаар ангаж цангаж байсан нэгэн байв. Гованни Брускагийн түүх 1970 оны дунд үеэс эхлэлтэй бөгөөд Сицилийн мафийнхан хэнийг үхүүлмээр байна тэд тэр хүнийхээ зургийг уг эрд үзүүлэхэд л хэдхэн хоногийн дотор асуудлыг ямар ч өршөөлгүйгээр найдвартай шийддэг байсан байна.
Тэрээр нийт 150-200 гаруй хүнийг алсан байх магадлалтай бөгөөд энэ ч утгаараа мафийн ертөнцийн бүх цаг үеийн хамгийн шилдэг алуурчнаар тодорсон юм. Ер нь бол хүн алах гэдэг нь түүний хувийн бизнес мэт байлаа. Тэрээр өөрийгөө чөлөөт уран бүтээлч хэмээн үзэж мафуудыг албан байгууллагууд хэмээн үзэн тэдэнтэй ажил гүйцэтгэх гэрээ байгуулан яг л бизнесийн зарчмаар ажилладаг байв. Үнэн хэрэгтээ бол Гованни Брускагийн хувьд амьдралыг аллагаас өөр нүдээр харах хэцүү байлаа. Тэрээр 1957 онд Сицил улсад төрж түүний элэнц өвөө, өвөө, эцэг зэрэг бүх эрчүүд нь орон нутгийн мафийн нэр хүндтэй гишүүд байсан юм. Тэр анх 5 настайдаа өөрийн эцгийг эргэхээр шоронд орж байсан бөгөөд эцгээ шоронд байх хугацаанд нь түүний хувцсыг угааж, зэвсгийг нь үргэлж цэвэрлэн арчилсаар байжээ.
Дөнгөж 18 настайдаа өөрийн анхны аллагын үйлдсэн бол 2 дахь аллагаа уг явдлаас жилийн дараа кино театрын гадаа үзэн яддаг хүнээ буудан хороосноор үргэлжилсэн юм. Үүнээс нэг их удалгүй Бруска нутгийн гэмт хэргийн бүлэглэлийн нэгэн толгойлогчийг тэрээр хөнөөсөн байна. Энэ цаг үед хүмүүс 20 дөнгөж хүрч буй хүүг боссуудын босс хэмээн дуудах болжээ. Тэрээр хөнөөх гэж буй хүмүүсээ эцсийг нь хүртэл чөлөөтэй яриулж бүх үгийг нь анхааралтай сонсдог боловч эцэст нь бүгдийг нь хөнөөж дуусгадаг байна. Хэрэв тэр таны амь гуйж ярихыг анхааралтай сонссоор байвал үүнд нь нэг их найдах хэрэггүй л болов уу.
Хохирогчийг хангалттай сонссоны дараа гэнэт араатан мэт авиран гарган алхаар хөлийг нь хугалж тэдний чихийг нь огтолдог заншилтай байсан гэж хэлж болно. Харин амь насыг нь хөнөөсний дараа цогцсыг нь хүчилд дүрж таних аргагүй болгосны дараагаар түүнийг газарт булдаг байсан тухай тэрээр өөрийн дурсамж номдоо бичин үлдээжээ. Мөн сонирхолтой нь тэрээр уг үйлдэлдээ хэзээ ч харамсаж байгаагүйгээс гадна хэзээ ч харамсахгүй гэдгээ ч давхар бичсэн юм. Тэрээр ер нь хэнийг алахаа огт мэддэггүй байсан бөгөөд өөрөөс нь илүү том толгойлогчид түүнд нэр зураг үзүүлэх үед л хохирогчоо нүдэлж төлөвлөгөөгөө зохиодог байжээ.
Нэгэн удаа түүнд ачааны машины жолоочийг алах даалгавар өгөөд машин явах зам, цаг, минутыг нь өгсөн байна. Гэвч тухайн үед гурван ачааны машин явж тэрээр ялгаж чадахгүй байсан тул бүх жолооч нарыг нь хөнөөсөн байдаг. Мөн Сицилийн засгийн газар гэмт бүлэглэлүүдийн эсрэг өргөн хүрээний үйл ажиллагаа явуулах үед буюу 1980 онд тэрээр өөрийн хүмүүсийг АК-47 буугаар зэвсэглэн цэрэг, цагдаагийн хүчнийхэнтэй ч тулалдаж явсан түүх бий. 1990 онуудад тэрээр улсын хэмжээнд томоохонд тооцогдох гэмт бүлэглэлийн толгойлогчдийг ээлж дараалан ангуучилж бүгдийг нь алж байж санаа нь амарсан юм. Эдгээр амиа алдсан гэмт бүлэглэлүүдийн толгойлогчдийн нэг болох Фалкони нь улс төрийн хувьд нэлээд нөлөөтэй эрхэм байсан тул уг хэргээс үүдэн цагдаагийн байгууллага түүний хамтрагчидыг нь цөм барьж шоронд хийсэн байна. Яг тухайн цаг үед Сицилийн гэмт хэргийн ертөнц үндсэндээ Рина гэх этгээдийн гарт орж эхэлсэн байдаг. Ринаг бүх нийтээр хамгийн дээд тушаалтан хэмээн хүлээн зөвшөөрсөнтай адил Бруска ч түүнийг дагах болжээ. Харин Ринад ганц дайсан байсан нь Ди Матио байлаа.
1993 оны нэгэн өдөр Ди Матиогийн 11 настай хүүг Бруска барьцаалсан байна. Хүүгийн эцэг яаж ч хичээгээд хүүгээ аварч чадахгүй байсан бөгөөд энэ бүх аймшиг бүхэл бүтэн 28 сарын турш үргэлжилсэн юм. Хүүг харанхуй өрөөнд торон дотор хорьж, зодож, өлсгөх зэргээр тамлан зургийг нь дарж эцэгт нь илгээдэг байлаа. Эцэст нь 1996 оны 1-р сард буюу хүүг 14 нас хүрэх үед Бруска амийг нь хөнөөж хүчилд дүрэн хүн таних аргагүй болгосон байдаг. Гэвч энэ явдлаас нэг их удалгүй 1996 оны 5-р сарын 20-ны өдөр цагдаагийн байгууллага 39 настай Брускаг Сицилийн хөдөө нутагт байрлах гэртээ байхад нь барьж авсан байна. Тэдний гэрийн гадаа нууцаар 100 орчим цагдаагийн ажилтан цуглаж оройн 9 цагт 30 гаруй тусгайгийн албан хаагчид түүнийг эхнэртэйгээ зурагт үзэж байхад нь гэрт нь нэвтрэн орж ирсэн аж. Энэ бүхнийг хүүхдээ алдсан Ди Матио хийсэн гэж тэрээр үзэн өшөөгөө авахыг хүссэн боловч нэгэнт цагдаагийн гарт орсон тул яаж ч чадсангүй. Шүүх хурлаас түүнийг амьд байх хэрэгтэй гэж үзэн бүх насаар нь хорих ялаар шийтгэсэн юм. Тэрээр одоо ч Сицилийн шоронд амьдарсаар байгаа аж.
