1919 оны 6-р сарын 27-ны өдөр Мичиганы голын эрэг дагуух цагаан арьстнуудын наран шарлагын газарт өсвөр насны хар арьст хүү явж байгаад цагаан арьс залуучуудад чулуу шидүүлэн амиа алджээ. Уг хүүг цагаан арьс залуучууд хэрхэн чулуугаар шидэж хөнөөснийг тэнд байсан хүмүүс бүгд гэрчилсэн боловч цагдаа тэднийг баривчилсангүй. Хүн амины хэрэг болчхоод байхад өнгөт арьст хүн тул цагдаагийн байгууллага тоолгүй өнгөрүүлсэн явдал нь өнгөт арьстнуудын уур бухимдлыг ихээр дэвэргэж гадаа гарч Чикаго хотын төвд жагсаал хийхэд хүргэжээ. Гэвч өнгөт арьстнуудын уг үйлдлийг цагаан арьстнууд ч мөн эсэргүүцэж тухайн үед хоёр талаас хүмүүс цуглан жагсаал нь даамжирч арьс өнгөний ялгаварлан гадуурхалын жижиг хэмжээний иргэний дайн болсон юм. Уг бослого дууссан өдөр буюу 8-р сарын 3-ны өдөр гэхэд нийт 15 цагаа, 23 хар арьст иргэд амиа алдсанаас гадна 500 гаруй хүн шархдаж 1000 гаруй өнгөт арьс хүмүүс гэр орноо сүйтгүүлсэн байна.
1919 зуныг АНУ-ын түүхэнд улаан зун хэмээн цохон тэмдэглэсэн юм. Дэлхийн нэгдүгээр дайны дараа асар олон тооны өнгөт арьст хүмүүс АНУ-д цагаачлан ирж бүх мужуудаар тархан суурьшиж байв. Харин дэлхийн нэгдүгээр дайн 1918 онд дууссан тул Европт тулалдаж байгаад дайны дараа гэртээ ирсэн иргэд үйлдвэрүүдэд ажилд орох гэтэл тэдний бүх ажлыг өнгөт арьст хүмүүс хийж байлаа. Халагдсан дайчид ажлаа хийх гэтэл хар арьстнууд тэднийг дээрэлхэн улмаар өөрсдийн эрхийнхээ төлөө тэмцэж эхэлсэн тул улс орон даяар хоёр талууд ер нь л арьс өнгөний байдлаас үүдэн туйлын тэмцлийн байдалтай болсон байв. Африк гаралтай Америк иргэд хуулийн дагуу тэгш эрх эдлэхийг шаардаж байсан юм.
Уг явдал нь арьс өнгөний үзлийн АНУ-ын хамгийн том бүлгэм болох Ku Klux Klan-ы үйл ажиллагаа дахин идэвхжихэд хүргэсэн байна. Тэд 1918 онд өмнө зүгийн мужуудад нийт 64 удаагийн бослого, мөргөлдөөн зохион байгуулсан бол 1919 онд 83 удаа зохион байгуулалттай мөргөлдөөн үүсгэжээ. 1909 он гэхэд Африк гаралтай Америкчуудын тоо жилд 44,000 өсөж байсан бол 1919 онд 100,000-аар өсөх болсон юм. Энэ бүхэн нь тус улсад шинэ төвшний аюулын харанга дэгдэж байгаагийн дохио болсон бөгөөд 1919 оны зун гэхэд нийслэл хот болон бусад томоохон мужуудад бүхэлд нь Ku Klux Klan үймээн самуун дэгдээж байв. Тэд өнгөт арьстнуудыг анх энэ улсад боолоор ирсэн тул одоо ч боол байх ёстой. Өнгөт арьстнууд хэзээ ч цагаан арьстнуудтай ижил эрх эдлэхгүй. Тэд бол хүний доод төрөл хэмээн итгэдэг хүмүүс байлаа. Хэдийгээр тэд бүгд ажил хийж байсан ч өнгөт арьст хүмүүсийн амьдралын түвшинг цагаан арьст хүмүүсийнхтэй харьцуулах аргагүй байсан юм.
Гол сэдэвтээ эргэж орох цаг боллоо. 1919 оны 6-р сарын 27-ны өдөр Южин Виллиамс хэмээх 17 настай Африк гаралтай Америк хүү Мичиганы голын цагаан арьст хүмүүсийн сэлэх газраар сэлж байгаад хэсэг цагаан арьс залууст чулуугаар шидүүлэн амиа алдсан юм. Өнгөт арьстнууд цагаан арьстнуудын хэсэгт орвол хатуу ял эдэлдэг байсан ч арай ч цаазаар авдаггүй байлаа. Түүнийг үхсэний дараа цагдаагийн албан хаагчид ирэв. Хар арьс иргэд өөрсдийн байрлах хэсгээс уг хэргийг харсан бөгөөд хүү цагаан арьст хүмүүсийн бүсд амиа алдсан тул тэд цогцос дээр нь очих эрх байсангүй. Удалгүй цагдаа ирсэн ч хүүг алсан хүнийг огт баривчилсангүй. Уг үйлдэл нь тэнд байсан өнгөт арьстнуудын бухимдлыг төрүүлж уг эргээс эхлэн эмх замбараагүй байдал дэгдэж эхэлсэн байна . Энэ бүхэн тархсаар Чикаго хотыг бүрэн хамарч үндсэрхэг үзэлтнүүд хоорондоо тулалдаж байдал бүхэлдээ цагдаагийн хяналтаас гарч 4 хоногийн онц байдал зарласан байдаг. Үймээн самуун 8-р сарын 3-ны өдрийг хүртэл үргэлжилж их хэмжээний зэвсэгт мөргөлдөөн гарсан тул хотод цэргүүдийг оруулж хатуу хяналт тогтоосон юм. Үр дүнд нь хар арьстнууд үнэхээр багахан ч болтугай амжилт гаргаж чадсан байдаг. Хотын даргын сонгуульд санал өгөх эрхтэй болсон, үйлдвэрт цагаан арьстнуудтай нэг өрөөнд хамт ажиллаж болох болсон, хотын удирдах зөвлөлд өнгөт арьст хүмүүсийг нэр дэвшүүлэх эрхтэй болсон зэрэг маш олон өөрчлөлтүүд уг бослогоос үүдэн бий болжээ.
