1897 онд Шведийн геологич Андре гэх эр гурван хүний бүрэлдэхүүнтэй баг байгуулан Арктикийн бүс нутгийг илрүүлэхээр явсан байдаг. Хамгийн сонирхолтой нь тэд уламжлалт аргаар буюу усан онгоцоор бус агаарын бөмбөлөг хийлээд түүгээрээ явсан юм. Өмнө нь агаарын бөмбөлгөөр Шведээс Орос болон Канад хүртэл явж байсан тул энэ нь хамгийн тохиромжтой тээврийн хэрэгсэл мөн гэж тэд итгэсэн байна. Гэсэн ч хүмүүс түүний уг үйлдлийг сайшаахгүй байсан тул тэрээр агаарын бөмбөлгөөр дамжин Парис, Берлин, Мадрид зэрэг хотууд уруу ямар ч саадгүй богино хугацаанд очиж үзүүлсэн аж. Гэсэн ч олон эрдэмтэд түүний үйлдлийг амиа хорлолт хэмээн үзэж болиулахаар бүхий л чадлаараа ятгасан байдаг.
Тэд аялалд гарснаасаа 3 хоногийн дараа Арктикт хүрсэн боловч харамсалтай нь тэр цагаас хойш ямар ч сураггүй болсон юм. Уг явдлаас 33 жилийн дараа Шведийн хойд туйл судлалын хөлөг онгоц хойд туйл орчимд явж байгаад эвдэрч сүйдсэн агаарын бөмбөлөг болон он цагын урсгалд элэгдэж муудсан хүмүүсийн амьдарч байсан гэмээр урцуудыг олжээ. Усан онгоцны багийнхан уг газрыг шинжиж үзэхэд 33 жилийн өмнө аялалд гарсан геологичид мөн болохыг тогтоосон байна. Тэд осолдсон боловч тухайн үед ганц ч хүн амьд эрстээгүй бөгөөд хэн нэгэн нь ирж аврах цаг мөчийг хүлээн тэд эцсээ хүртэл амьдарсаар байсныг гэрчлэх олон зүйлс олджээ.
Тэднийг олсон жил буюу 1930 онд Шведийн хэвлэл мэдээллийн хамгийн гол сэдэв нь уг сэдэв болоод байв. Гэхдээ тэд осолдсон гэдгээс илүүтэйгээр хэн нэгэн нь тэднийг ирж аварна хэмээн эцсээ хүртэл бүх аргаар амьдарч байсан нь илүү сонирхолтой байсан юм. Гурван эр хамтдаа 10-аас илүү жил амьдарсан болохыг тогтоосон бөгөөд тэд гал асааж цагаан баавгай, загас агнаж дан мах идэж 10 гаруй жил амьдарсан байна. Тэдний цогцоснууд нь цөм цагаан баавгайн арьсан дээл нөмөрсөн байсан боловч бүх хүмүүсийн үхлийн шалтгаан нь хөлдөлт гэж гарсан юм. Мөн хамгийн сонирхолтой нь бүгд нэг цагт нэг дор хамтдаа нас барсан нь хойд туйлд цаг агаар цочир хүйтэрч хүмүүсийг хормын дотор хөлдөөж алсан байх боломжтой болж таарч байгаа аж.
