Энэ үйл явдал нь 2013 онд АНУ-ын өмнөд Каролина мужид болсон бөгөөд залуухан эцэг эх өөрсдийн 7 сартай бяцхан хүү Финн Жорданыг асруулахаар 22 настай хүүхэд асрагч Алексис Ханыг хөлсөлсөн байна. Түүний эцэг Бенжамин Жордан нэгэн үйл явдлыг удаан хугацааны турш ажигласаар иржээ. Алексис Ханыг гэрт байхад тэдний нохой маш догшин болон хувирч бяцхан хүү болон хүүхэд асрагч хоёрын дундуур орж үргэлж Алексисийн зүг хуцдаг байв. Мөн яг л муур мэт нурууны үс нь босох зэрэг нь эзнийг нь багагүй гайхшруулдаг байжээ.
Тэдний нохойг Киллан гэх бөгөөд Герман хоньч нохойны эрлийз уг үүлдрийн нохой нь туйлын даруухан эелдэг зантай амьтан аж. Нэг л зүйл болохгүй байгааг гадарласан Финний эцэг эх нь нэгэн өдөр ажилдаа явахдаа гэртээ нууцаар дуу хураагуур байрлуулан явсан байна. Тухайн өдрийн орой тэд гэртээ харин Алексисийг явсны дараа хураасан дууг сонсож үзээд бараг л ухаан алдах дөхсөнгүй. Тэдний хүүхдийг асрагч нь “хараал идсэн амьтан минь амаа тат” зэрэг бүдүүлэг үгсээр тасралтгүй хараан доромжилж мөн хүүхдийг нь алгадах чимээ сонсогдож хүүхэд нь бүтэн өдрийг гэртээ хүчирхийлэлд өртөн уйлж өнгөрүүлдэг болохыг мэдсэн байна.
Хүүхдийн эцэг эх нь хууль хяналтын байгууллагад хандсан боловч цагдаагийн албан хаагчид дуу хураагуурыг шүүхийн өмнө хангалттай нотлох баримт болохгүй байж магадгүй хэмээн айж байгаа гэнэ. Гэсэн хэдий ч холбогдох байгууллагаас хэрэг үүсгэн мөрдөгч томилон шалгасаар түүнийг шүүх хурлаар оруулж 3 жилийн хорих ял оноож хувийн мэдээлэл дээр нь хүүхдийн хүчирхийлэгч хэмээн онцлон тэмдэглэх шийдвэр гаргасан байна. Тэрээр шоронгоос гарсан ч хувийн мэдээлэл дээр нь хүүхдийн хүчирхийлэгч гэх үг байх тул хойшид ямар нэгэн ажилд ороход туйлын хүнд болох нь мэдээж. Харин нохойны хувьд эзэд нь түүний ухааныг магтаж илүү сайн асран хооллох болсон гэнэ.
