Хүн төрөлхтөн бид өөрсдийгөө цаг хугацааны ганцхан эзэд хэмээн итгэж хэзээ ч үхэхгүй мэт өдөр бүрийг өөр өөрсдийнхөөрөө урсан өнгөрүүлсээр байдаг. Зарим нэг нь ямар нэгэн чухал зүйлийн төлөө, зорилгынхоо төлөө бүхий л нөөц бололцоогоо дайчилдаг бол зарим хэсэг нь цаг хугацааг элээх төдийхнөөр, амьсгалах төдийхнөөр амьдардаг нь үнэн. Өвчин зовлонд баригдсан хэн нэгэн нь ердөө ганцхан өдөр өвдөхгүй байхыг, эрүүл байсан бол хийж бүтээж болох байсан бүхнээ дурсан гашууддаг аж. Үхлээ хүлээж байгаа хүн л гагцхүү өөрт нь хэчнээн их нөөц бололцоо нуугдаж байсныг мэддэг мэт. Гэвч үнэн гэвэл өнөөдөр та болоод таны таньдаг хүн бүхэн зуун жилийн дараа гэхэд үхсэн байна. Хүн олон зүйлийг өөрчилж чадах боловч үүнийг өөрчлөх боломжгүй юм.
2013 онд АНУ-ын кино найруулагч Роберт Родриегуз болон зохиолч Жон Малкович хоёр нэгэн хачирхалтай төсөл дээр хамтран ажиллахаар болжээ. Уг төсөлдөө АНУ-ын жүжигчин Жон Малкович болон Тайваны жүжигчин Шуяа Чанг, Чилийн Марко Зарор зэрэг хүмүүсийг хамруулжээ. Тэдний бүтээл нь 100 жил хэмээх нэртэй кино бөгөөд 2015 онд киног хийж дуусган ердөө ганцхан хувь хувилан дэлхийн хаа нэгтээ аль нэг алдарт конякны үйлдвэрийн зооринд хадгалсан байна. Учир нь тус үйлдвэр уг киног ивээн тэтгэсэн бөгөөд киноны нээлт нь кино бүтээсэн цагаас 100 жилийн дараа буюу 2115 оны 11-р сарын 18-ны өдөр болох юм. Тухайн үед дэлхий ертөнц чухам ямар байхыг хэн ч хэлж мэдэхгүй, магадгүй соёл иргэншил сүйрсэн байхыг ч үгүйсгэхгүй. Гэвч тэд энэхүү төслөө заавал хэрэгжүүлэхээр шийдсэн юм. Уг киноны ганц хувийг маш өндөр зэрэглэлийн хамгаалалттай газарт сум нэвтэрдэггүй шилэн хайрцганд эх хувиар нь хийн битүүмжилсэн юм. Мөн хакер зэрэг цахим халдлагад өртөх ямар ч боломжгүй байгаа аж. Хэрэв таны нас хүрвэл та заавал уг киног үзэж биднийг дурсаарай.
