Нэлээд хугацааны турш шуугиан дэгдээсэн энэ зургийг үзэж хараагүй хүн гэж бараг үгүй байх. Германчууд бүгд нацист намыг сүрдэн биширч ард түмэн бүхэлдээ тэдний үгээр хөдөлж байхад бүхэл бүтэн системийг сөрөн зогсоно гэдэг хувь хүнээс нэлээдгүй зориг, хүчин чармайлт шаардах нь мэдээж. Тэгвэл 1936 онд Гитлер төрийн ордны урд талбайд мэдэгдэл хийн нацист ёсолгоо хийж байхад цор ганцаар ёсолгоо хийгээгүй уг эрийг Август Ландмессер гэх бөгөөд мөн чанартаа тэрээр огт нацист нэгэн байсангүй. Ердөө л цагийн байдал өөр байсан тул өөрт нь ажил олдож магадгүй хэмээн найдаж нацист намд элссэн эр байв.
Түүнчлэн тэрээр 1935 онд еврей бүсгүй Ирма Эклертай хайр сэтгэлийн холбоотой болсон аж. Гэвч тухайн цаг үед Герман улс даяар еврейчүүдийг хавчин гадуурхах үзэл түгэн дэлгэрч үүнийг нацист нам гардан хийж байлаа. Дурлалт залуу өөрийн хайртай бүсгүйтэйгээ гэрлэлтээ батлуулах гэсэн боловч иргэний бүртгэлийн газар еврей хүнийг Герман хүнтэй гэр бүл болохыг хуулиар хориглосон байв. Ямар ч аргагүй болсон хөөрхий залуу эцсээ хүртэл зүтгэсэн бөгөөд 1936 онд болсон нацист илтгэлийн үеэр өөрийнхөө эсэргүүцлийг илэрхийлэн ийн зогссон нь гэрэл зурагт өртсөн байдаг аж.
Август Ландмессер уг явдлын дараахан шоронд орсон бөгөөд түүнийг үндэс угсаагаа бузарлахыг завдсан гэх шалтгаанаар хоёр жилийн хорих ял оноон төрийн албанд ажиллах эрхийг нь халсан байна. Түүнийг шоронд орсны дараа хайрт бүсгүй Ирма Эклер Германы Франкфурт хотын ойролцоо орших үхлийн лагерь уруу бусад еврейчүүдийн хамт илгээгдэн тэндээс хэзээ ч амьд гарч чадаагүй юм. 1940 онд шоронгоос гарсан эр өөрийн хайрт бүсгүйг тасралтгүй эрж хайсан боловч ямар ч ул мөр олдоогүй гэдэг. Улмаар түүнийг нацист нам хүчээр цэрэгт элсүүлэх үед тэрээр эх орноосоо оргон зугтсан байна. Учир нь түүний хайрт бүсгүйг нацистууд хөнөөсөн эсвэл ямар нэгэн муу зүйл хийсэн нь мэдээж байсан тул нацист төрийн төлөө тулалдах нь түүнд утгагүй санагдсан аж. Тэрээр дайны дараа баруун Германд үлдсэн амьдралынхаа турш амьдарсан юм.
