Занзибар улс нь Энэтхэгийн далайд орших Африк тивийн жижигхэн арал улс бөгөөд бусад улсуудтай харьцуулахад харьцангуй эрт буюу 1698 оны үеэс Их Британы колони болсон байдаг. Уг улс нь түүхэн уламжлалын хувьд хаан буюу султантай улс байсан бөгөөд Их Британы эзэмшилд орсноор султан ямар ч эрх мэдэлгүй болж бэлэг тэмдэг төдийхөн болсон байна. Харин 1896 оны 8-р сарын 25-ны өдөр хууль ёсны султан нь нас барснаар тухайн ард түмний үндэсний үзэл дээд цэгтээ хүрсэн байдаг. Угаас үржил шим муутай жижиг арал улс барьсан бага зэрэг загасаа Их Британид тушаасаар өөрсдөө өлсгөлөнд нэрвэгдсэн хэрэг. Иймд түүний хаан ширээг залгамжлах хоёр хүн байсан нь султан Хаммад болон султан Халид нар байлаа. Энэрэнгүй зөөлөн сэтгэлтэй, эгэл амьдрал илүү ойлгодог учир Халидыг ард түмэн нь хаанаар өргөмжилсөн байна. Гэвч энэ сонголт Их Британы таалалд нийцээгүй бөгөөд суудлаасаа буухыг шаардахад хариуд болгож 1986 оны 8-р сарын 27-ны өдөр Их Британитай албан ёсоор дайн зарласан байдаг.
Уг дайнд Занзибар улсын цэргийн хүч нь бүхэлдээ энгийн иргэдээс бүрдсэн 2800 явган цэрэг, 4 их буу, 2 ширхэг завьтай арми байлаа. Дайн зарласан мэдээг Их Британы адмирал Harry Rawson сонссон даруйдаа Английн 150 усан цэргийг Занзибарын 900 хөлсний цэрэгтэй хамт дагуулан хоёр байлдааны круззер хөлөгт суулган яг өглөөний 9:02 минутад задгай далайгаас султаны ордон уруу их буугаар буудаж эхэлсэн байдаг. Үүний хариуд Занзибарын 4 их буу гал нээсэн боловч амжилт ололгүй бүгд сүйрч хариуцаж байсан офицер нь ч газар дээрээ амиа алджээ. Харин Занзибарын 2 ширхэг завь нь боомтоос гарсан даруйдаа их бууны суманд өртөн тэр дороо живсэн байдаг. Их Британы талаас тасралтгүй гал нээсээр байсан бөгөөд цаг 9:40 болох үед султаны ордон Занзибар улсын тугийг буулган цагаан туг мандуулсан аж. Тус дайн ердөө 38 минут үргэлжилсэн нь түүхэн дахь хамгийн богино дайн болсон аж.
Уг дайнд ялагдал хүлээсэн султан Халид арал дээр байх Германы элчин сайдын яаманд яаравчлан очиж улс төрийн орогнол хүсэж амиа аварч чадсан түүхтэй. Харин Их Британы тал нэн яаралтай буюу тухайн өдрөө Хаммадыг султаны суудалд суулгасан байдаг. Өнөөдөр тус улс нь автономит улс гэсэн статустай явдаг байна.
