Ихэнх киног амьдралаас сэдэвлэн бүтээсэн байдаг тул кинон дээр гардаг зүйлс амьдралд тохиолдох магадлал өндөр байдаг. Тэгвэл 2006 онд яг үүнийг батлах нэгэн үйл явдал болжээ. Тодруулбал 2006 онд нэг гэр бүлийн гурван хүн Шинэ Гвинейн арлуудаар түрээсийн моторт завьтай зугаалж явж байтал хүчтэй давлагаа тэднийг мөргөн завийг нь хөмрүүлсэн байна. Аз болж зорчигчид бүгд аврах хантаазтай байсан тул хэн ч живсэнгүй, харин тухайн бүс нутагт махчин загас ихтэйг мэдэх тул хамгийн ойрхон харагдах арал уруу бүхий л хурдаараа сэлсэн гэнэ.
Ийнхүү ямар ч хүнгүй, эзэн ч үгүй, ер нь урьд өмнө нь хүн ирж байсан үгүй нь ч тодорхойгүй уг арал дээр тэд гурван хоногийг өнгөрүүлсэн байдаг. Тэд маш их өлсөж эхэлсэн тул арал дээр ургах жимснүүдээс бага багаар идэж эхэлсэн бөгөөд биед нь ямар нэг өөрчлөлт гараагүй тул үргэлжлүүлэн ихээр идэж хоол хүнсний хэрэгцээгээ хангаж байв. Харин уух усны хувьд кокосын шүүсийг усаар орлуулж байсан байна.
Түүнчлэн аврагдах итгэл найдвараа алдахгүйн тулд дал модны навчсыг хооронд нь холбон зузаан болгож “HELP” гэх тэмдгийг далайн эргийн элсэн дээр тод харагдахаар байрлуулжээ. Ийнхүү тэд очих ёстой газраа очилгүй ор сураггүй алга болсон тул найз нөхөд, төрөл садан нь цагдаад мэдэгдсэн бөгөөд үүний дагуу бүс нутгаар тэднийг хайх эрлийн ажиллагаа эхэлж 3 өдрийн дараа тэднийг АНУ-ын эргийн хамгаалалтын нисдэг тэрэг олсон байна. Өндөр хөгжилтэй газарт 3 хүн асуудалд ороход нисдэг тэргээр хайдаг нь их сайхан санагдав.
Нисдэг тэрэг тэднийг олсноос 2 цагийн дараа аврах бүрэлдэхүүн бүхий завь ирж тэднийг эмнэлэгт хүргэсэн байна. Бүх хүний биеийн байдал хэвийн бөгөөд тэдэнд тохиолдсон уг явдал сайнаар төгссөн нь насан туршийнх нь гайхалтай дурсамж болж үлдлээ хэмээн баярлацгаасан гэнэ.
