1989 оны 4-р сарын 1-ны өдөр энэ бүх үйл явдал тохиолдсон юм. Их Британы тэрбумтан эр Ричард Брансон төрөлхийн хошин шогийн мэдрэмж сайтай хүн байлаа. Иймээс олон хүмүүсийг хамарсан өргөн хэмжээний хууралтыг тус өдөр зохиохоор шийдэв. Ийнхүү удаан хугацаанд бодсоны эцэст хуурамч нисдэг таваг бүтээхээр болжээ. Тэр агаарын бөмбөлгийг хэлбэрт оруулан хийлж гадуур нь арван секунд тутам анивчдаг гэрлэн утсыг бүхэлд нь бүрсэн байна. Харин уг агаарын бөмбөлөг дотроо өөрөө харь гаригийн хүний хувцас өмсөн суужээ.
Нисдэг тавагны хэлбэртэй агаарын бөмбөлөг тухайн жилийн инээдмийн баярын өглөөний 4 цагт агаарт хөөрч Лондон хотын М25 өргөн чөлөөний зүг ниссэн байна. Тухайн өдрийн үүрээр тус замаар машинаа жолоодон явж байсан жолоочид бүхэлдээ тогонд цохиулсан мэт болов. Цаг хугацаа өнгөрөх бүрт машинуудын тоо өссөөр байх бөгөөд цагдаагийнхан Лондон хотыг өглөөний 6 цаг гэхэд бүхэлд нь хамгаалалтад авав. Засгийн газрын зүгээс зэвсэгт хүчнийг бэлэн байдалд шилжүүлэн ойролцоох агаарын нисэх хүчний ангиуд байлдааны бэлэн байдалд оров. Сонин, радиогийн сэтгүүлчид хэдийнээ ирчихсэн газар дээрээс нь шууд дамжуулалт хийж байлаа.
Баян эр өөрийн нисдэг тавгийг уг нь “Хайд парк” орчимд буулгахаар төлөвлөж байсан ч цаг уурын таагүй нөхцөл байдлын улмаас чиглэл нь өөрчлөгдөн цэнгэлдэх хүрээлэн дотор газарджээ. Түүний буух газрыг цагдаагийнхан тогтоож яг буухын өмнө цэрэг, цагдаагийн хамтарсан бүслэлт хийсэн байна. Агаарын бөмбөлөг газарт буух үед цагдаагийн албан хаагчид үүнийг яг юу болохыг нь ойлгож чадалгүй дэмий л буугаа барин зогсов. Гэвч газардсан даруйд нөхцөл байдал арай өөрөөр эргэснийг анзаарсан тэрбумтан эр өмсгөлийнхөө багийг нүүрнээсээ авч гадагш гарсан аж. Цагдаагийнхан болон засгийн газар түүний хийсэн үйлдэлд ямар ч арга хэмжээ аваагүй бөгөөд энэ явдал нь нэг үндэстнийг бүхэлд нь хуурсан цөөхөн хэдхэн тохиолдлуудын нэг юм.
