Энэтхэгийн баруун Бенгал мужийн Колкат хэмээх хотод дэлхийд байдаггүй нэгэн өвөрмөц кафе байх бөгөөд тэр газрыг “эерэг хандлага кафе” хэмээн эзэн нь нэрлэсэн байна. Учир нь анхлан Каллал Гоуш гэх нэгэн эр кафе нээхээр шийдсэн бөгөөд гагцхүү ижил үйл ажиллагаа явуулдаг бусад хэдэн зуун кафенуудаас ялгарахын тулд тэрээр нэгэн арга бодож олжээ. Энэтхэг улсад ХДХВ буюу ДОХ-ын халдвартай 2 сая гаруй иргэн амьдрах боловч тэдний улс, төр засгаас хангалттай хамгаалж чаддаггүй аж. Мөн тэдний өвчнөөс болж ялгаварлан гадуурхалд өртөж нийгмийн байр сууриа ч алддаг байна. Иймээс тэрээр ДОХ-ын халдвартай хүмүүст зориулсан кафе нээхээр шийдсэн юм.
Үйл ажиллагаагаа нээсэн даруйдаа хичээл сургуулиасаа хөөгдсөн, амьдралын утга учраа алдсан ХДХВ-ын халдвартай оюутнуудтай уулзан тэднээс арван оюутныг өөрийн кафед ажилд орсон байна. Мөн Колкат хот даяар сурталчилгаа тарааж эхэлжээ. Эхний хэдэн сар тэдний кафегаар өдөрт 2-3 хүн л үйлчлүүлдэг байв. Ажилчдыг нь ДОХ-той гэдгийг нь хүмүүс мэддэг тул халдваргүй хүмүүс тийшээ очиж өөрсдийгөө эрсдэлд оруулах хэрэггүй гэж боддог байсан юм. Харин халдвартай хүмүүсийн хувьд халдваргүй хүмүүсээсээ санаа зовдог тул мөн л тэр кафед очиж өөрсдийгөө илчлэхийг хүсдэггүй байжээ.
Гэвч цаг хугацаа өнгөрсөөр 2002 оны 4-р сар буюу үйл ажиллагаа явуулж эхэлснээс 1 жил гаруй хугацааны дараа олон улсын байгууллагууд болон дэлхий нийтийн хэвлэл мэдээллийн томоохон байгууллагын хараанд тэдний кафе өртсөнөөр Энэтхэг төдийгүй дэлхий нийтээр танигдаж эхэлсэн байна. Үүний үр дүнд гадна дотны олон хүмүүс тус кафег зорин ирэх болсноор тэдний орлого огцом өсжээ. Ойролцоогоор өдөрт 200 гаруй хүн үйлчлүүлдэг бөгөөд тэдний дийлэнх хэсгийг мэдээж халдваргүй хүмүүс эзэлдэг аж. Харин кафен эзэн олсон орлогийн тодорхой хэсгийг ажилчдынхаа нийгмийн байдлыг дээш нь татахад ашигладаг бол үлдсэн хэсгийг нь ХДХВ-ын халдвартай хүмүүсийн төлөө сайн үйлсийн байгууллагад хандивладаг байна.
