Гавьяат жүжигчин Г.Ариунбаатар бүсгүйчүүдийн хайрыг татдаг хүсэмжит залуусын жагсаалтад хамгийн удаан оршин тогтнож байгаа алдартан. 23 насандаа Гавьяат жүжигчин цол хүртсэн түүнийг тойрсон бүсгүйчүүдийн эмоци тасардаггүй. Одоогоос таван жилийн өмнө дуурийн театрын басхүү халуухан бүсгүйчүүдийг тэргүүлэгч Д.Отгонжаргалтай бичсэн чаат нь задарч, халуун сенсааци дэгдэж байв. Мэдээж дайчин зоримогоороо Г.Ариунбаатар энэ явдлын талаар дэлгэрэнгүй ярилцлага өгч байсан юм. Тэд СУИС-ийн найзууд, нэг багшийн шавь нар. “Үнэндээ бид хоёр дотно болоход болохгүй гэх асуудал байхгүй” гэж тэр хүмүүсийн хэрэгт дурласан шуугианыг дарж байсан юм.
Тэгвэл дуулианы эзэд болох хэн хэн нь өндөр карьертай яваа залуус таван жилийн дараа эргэн нийлэв. Тэд хамтдаа “Хувьсал” продакшны 20 жилийн ойдоо зориулан бүтээсэн “Тэнгэрээс буусан од” киноны дууг дуулжээ. Тунчиг гүнзгий агуулга бүхий хайрын дууг ихэд мэдэрч, өөриймсөг дуулсан талаар сонссон хүмүүс жиг жуг хийж байна.
Г.Ариунбаатарын хувьд хайр дурлалын талбарт эцсийн цэгээ хатгаж, жүжигчин Б.Баярмаатай ханилсан гэх ба хосууд хоёр дахь хүүхдээ өлгийдөн авч, аз жаргалтай амьдарч байгаа. Харин Д.Отгонжаргал “Миний ээж тэмээчин” дуугаараа ард түмнийг мэлмэрүүлж, “Алтангадас” одонгоор энгэрээ цоолсон. Тэр ганц бие ээж хэвээр, нам жим амьдарсаар.
Сэтгэл гэгэлзэм хайрын дууг энэ хоёр дуулснаар олон жилийн хардлагад нөгөө талаараа бас цэг тавьж байна. Цаг хугацаа бүхнийг шүүгч ажээ.
