19-р зууны дунд үед АНУ-ын Minnesota мужид Америкчууд болон индианы Dakota омгийнхон хамт аж төрөн амьдардаг байв. Мэдээж индиан овгийг соёл иргэншилт барууны иргэдтэй харьцуулах араггүй. Тийм ч учраас уг давуу талаа ашиглан Индианчуудыг ялгаварлан гадуураж, дээрэлхэж ханддаг хүмүүс ч мөн байдаг байлаа. Тэдний нэг нь Andrew Myrick гэх худалдааны пүүсийн эзэн байв. Тэрээр Индианчуудад маш өндөр үнээр асар бага хэмжээний хүнс өгдөг байсан бөгөөд уг явдлаас болж хэд хэдэн удаа үл ойлголцол, гар зөрөлдөх байдал ч үүсч байжээ. 1861 онд нэгэн өдөр хоёр Индиан түүн дээр ирж багахан хэмжээний алт өгөхөд алтыг нь шүүрч аваад хариуд нь гурван талх өгсөн байдаг.
Үүгээр зогсохгүй өлсгөлөн Индианчууд байгаа бүхнээ барьсаар түүнийг зорин ирэх үед тэрээр “та нар үлдсэн амьдралдаа миний малын хашаанд өвс идэж амьдрах хувьтай амьтад” хэмээн тэднийг доромжилжээ. Энэ бүх үйлдлүүд нь хэтэрхий шударга бус санагдаж эхэлсэн тул Dakota омгийнхны үндсэрхэг үзэл дэвэрч өөрсдийн газар нутаг дээр ингэж дээрэлхүүлж амьдрахгүй гэж шийдэн зэвсэгт тэмцэл эхлүүлсэн түүхтэй. Ийнхүү 1862 оны 8-р сарын 17-ны өдрөөс 1862 оны 12-р сарын 26-ны өдрийг хүртэл үргэлжилсэн Dakota-ын тулаан эхэлсэн юм.
Уг дайны эхний өдөр Minnesota мужийн төв суурин уруу Индианчууд гэнэтийн довтолгоон хийж эрчүүдийг болон цэргүүдийг хайр найргүй устгасан байдаг. Тэр өдрийн орой АНУ-ын армийн цэргүүд хотод очих үед хотоос нилээн зайтай газраас Andrew Myrick гэх худалдаачны цогцсыг олжээ. Түүний аманд өвс чихэж алсан байв. Чухам 2 талаас нийтдээ 2000 гаруй хүний амийг авч одсон уг дайны шалтгаан нь Adrew Myrick байсан гэдэгтэй өнөөдөр хэн ч маргадаггүй юм. Түүний амиа хичээсэн, дээрэнгүй, шуналт үйлдэл хэрээс хэтэрсэн бөгөөд тэрээр үүнийхээ хариуг ч авсан түүхтэй.
