1930 оны дунд үеэс АНУ-ын коллежийн оюутнууд утасны бүхээгэн дотор аль болох олуулаа багтах нэгэн тоглоом тогложээ. Эхний өдөр ердөө 10 оюутан багтсан бөгөөд хэдэн сарын дараа 13 оюутан АНУ-ын өөр мужид багтаж чадсан байна. Гэвч удалгүй Канад улсад 15, ӨАБНУ-д 17 гэх мэтээр тоо нь улам бүр өссөөр л байлаа. Харин 1950 он гэхэд уг өрсөлдөөн нь АНУ-аар тогтохгүй бүхий л дэлхийг хамарсан рекорд тогтоохын төлөөх тэмцэл, спорт болон хувирсан байв.
Жишээлбэл Illinois-ын их сургуулийн оюутнууд утасны бүхээгэнд орох үедээ өөрсдийгөө хүн төрөлхтний рекордыг эвдэнэ хэмээн зарлаж сонингийн сэтгүүлчид, гэрэл зурагчдийг дуудсан байдаг. Гэвч тэдний рекордыг хэдэн сарын дараа дэлхийн өөр өнцөг буланд байгаа хүмүүс эвдчихдэг ийм л сонин төрлийн өрсөлдөөн байлаа. Уг төрөл зүйлд хэт донтсон оюутнууд сүүлдээ хичээл сурлагадаа муудаж, оюун ухаан нь утасны бүхээгт хэрхэн олон хүн багтаах уу гэдэгт л төвлөрөх болсон байна.
Ийнхүү 1945 онд буюу дэлхийн 2-р дайн дуусдаг жил Канад улсад 40 оюутан нэгэн зэрэг утасны бүхээгт багтсан гэх мэдээ дэлхий нийтэд цацагдаж уг төрлөөр өрсөлддөг маш олон хүмүүсийн уур бухимдлыг нэгэн зэрэг хүргэсэн боловч хангалттай нотлох баримт байхгүй гэдэг үндэслэлээр тооцоогүй байна. Үнэндээ бол энэ бүхэн зохиомол яриа байсан бөгөөд мэргэжлийн хүмүүс 40 хүн хэрхэвч багтахгүйг батлан хэлсэн аж. Харин 1959 онд онд ӨАБНУ-ын оюутнууд утасны бүхээгт бүх нийтийн нүдэн дээр 25 хүнийг багтааж чадсан бөгөөд энэ нь дэлхийн шинэ рекорд болон бүртгэгдэж Time сэтгүүл дээр хүртэл гарч байлаа.
Дэлхийн өнцөг булан бүрт оршин суугаа уг төрөл зүйлийг сонирхогч хүмүүст уг мэдээ тун хүндээр туссан бөгөөд тэд ч ядаж 26 хүн багтаахын төлөө маш олон удаагийн туршилт хийсэн боловч үнэхээр хэн ч хэзээ ч 26 хүнийг багтааж чадсангүй. Иймд уг спортын дээд рекордыг албан ёсоор ӨАБНУ эзэмшдэг байна. Уг рекордыг хэн ч эвдэж чадахгүйг нэгэнт ойлгосон олон нийт аажимдаа утасны бүхээгэнд чихэлдэх тэмцээнийг сонирхохоо байсан юм. Учир нь дээд хязгаартаа хэдийнээ хүрчихсэн байлаа.
