2009 оны зул сарын баярын өдөр АНУ-ын Tennessee мужийн Nashville хотод байрлах “Sun Trust” банкны нэгэн салбарт хар нүдний шилтэй Санта орж ирэн хэсэг орчныг ажиглан алхсан байна. Тэрээр том улаан шуудайтай байсан бөгөөд банкны хамгаалагч, үйлчлэгчид гээд хэн ч түүнийг онцгойлон анхаараагүй аж. Санта хувцастай хүмүүс зул сарын баярын өдөр хаа сайгүй л алхаж байдаг болохоор тэр биз.
Гэвч хэсэг хормын дараа тэрээр шуудайгаа ухан гэнэт гар буу гаргаж ирэн банкны хамгаалагчийн зүг далайлган тэнд байсан бүх хүмүүсийг барьцаалжээ. Санта хамгаалагчийн зэвсгийг хураасны дараа ахлах теллерт нь улаан шуудайгаа өгч мөнгөөр дүүргэхийг шаардсан байна. Дээрмийн ажиллагаа 10 минут үргэлжилсэн бөгөөд банкны ажилтан мөнгийг нь дүүргэж өгмөгц тэрээр маш хурдан үүд уруу гарахаар гүйжээ. Гэвч яг гарахын өмнө эргэж хараад “новшийн элфүүддээ цалинг нь тавьж чадахгүй болохоор ажил хийх хүн алга, баярлалаа” хэмээн хэлээд гарч оджээ.
Түүний бүхий л дүрс хяналтын камерт бичигдсэн боловч чухам хэн гэдгийг нь таних боломж байхгүй байв. Сантагийн дүр хувиргалт яг цагаа олсон хамгийн сайн өнгөлөн далдлалттай дээрэм хэмээн Tennessee мужид бүртгэгдсэн бөгөөд түүнийг банкнаас гараад ямар машинд сууж зугтсаныг ч хяналтын камераар бичиж чадсан юм. Хэдийгээр камерт машины улсын дугаар харагдсан боловч энэ нь 5 сарын өмнө хулгайлагдсан улаан мустанг загварын машин болохыг тогтоожээ.
Ийнхүү Санта гэнэт гарч ирсэн шигээ гэнэт алга болсон бөгөөд түүнийг одоо хүртэл олоогүй юм. Магадгүй жинхэнэ Санта аргаа бараад ойролцоо орших банк дээрэмдэж элфүүддээ цалинг нь олгосон ч байж болох.
