Түүний бүтэн нэрийг Martin Laurello гэх бөгөөд 1885 онд Герман улсад төрсөн тэрээр хүүхэд байхаасаа өөрийнхөө бусдаас ялгарах чадварыг нээж илрүүлсэн байдаг. Уг чадвар нь өөрийн толгойг 180 градус эргүүлэх бөгөөд үүнийг нь харсан хүмүүс цөм мэл гайхаж, алмайрдаг байсан тул уг авьяасаараа мөнгө олж болох юм гэх бодол төрсөн аж. Тэрээр Европын улсуудад өөрийн өвөрмөц үзүүлбэрийг үзүүлж хангалттай хэмжээний мөнгө олсны дараа шинэ зах зээлийг хүсэж эхэлсэн бөгөөд уг хүслийг нь биелүүлэх ганц газар АНУ байсан тул тэрээр 1921 онд АНУ-ыг зорьсон түүхтэй.
Тэнд очоод Martin Laurello жинхэнэ од болсон бөгөөд хувийн явуулын цирк байгуулж хэнтэй ч хамтралгүй зөвхөн өөрийн бие даасан үзүүлбэрүүдээр мөнгийг хангалттай олж “хүн шар шувуу” гэх хочтой болсон байв. Тэрээр үзүүлбэрээрээ хүмүүсийг уйдаахгүйн тулд зөвхөн толгойгоо эргүүлээд дуусах бус толгойгоо эргүүлээстэйгээр үзүүлэн тоглолтууд бэлтгэж өөрөө найруулга хийн өөрөө жүжиглэн хүргэдэг байлаа. Гэсэн хэдий ч тэрээр дотоод мөн чанартаа Америк улсыг жигшин зэвүүцдэг нэгэн байсан юм.
1931 онд түүнийг цагдаа нар АНУ-ын тугийг газарт шидэж, шатаасан тул эх орныг нь доромжилсон гэх үндэслэлээр баривчилж Герман уруу буцаах дээрээ тулсан ч Martin уучлалт гуйж энэ бүхнээс аврагдсан байдаг. Тэрээр дэлхийн хоёрдугаар дайн эхлэх үед Гитлерийг дэмжиж гэртээ хана болгонд нацист туг, Гитлерийн хөргийг наасан бөгөөд уг хувийн нууцаа хүнд алдахгүйн тулд хэнийг ч гэртээ оруулдаггүй байжээ. 1955 онд түүнийг нас барсны дараа бүхий л хувийн амьдрал нь ил болсон юм.
