Уг үйл явдал 1871 оны 10-р сарын 24-ны өдөр АНУ-ын Los Angeles хотод болсон байдаг. Тухайн үед АНУ нь Манж гүрэнтэй ажил эрхлэх гэрээ байгуулсны үндсэн дээр маш олон Хятадууд АНУ-д нэвтрэн ажиллах анхны томоохон Хятад хорооллууд баригдаж эхэлсэн түүхтэй. Тухайн үед Хятадуудыг өнгөт арьстнууд шиг боол гэж үзэхгүй ч гэсэн бүхий л цагаан арьстнууд жигшин зэвүүцэж байсан байна. Учир нь тэдний хэд хэдэн үйлдэл оршин суугч Америкчуудад огт таалагдаагүй аж.
Тухайн үеийн Los Angeles-ын Хятад хороололд 200 гаруй хүн амьдардаг байсан бөгөөд тэдний 80 хувь нь эрчүүд байжээ. Харин эмэгтэйчүүдийн хувьд дийлэнх нь биеэ үнэлж амьдардаг байсан бөгөөд уг үйлдэл нь Америкчуудын жигшлийг туйлын хүргэдэг байсан бөгөөд Хятадуудыг бодлогоор эх нутгаасаа эмэгтэйчүүдийг цөөн тоогоор авчирдаг гэж буруутгадаг байсан байна. Түүнчлэн Хятад хүнийг Америкчууд хараад хүний ангилалд оруулдаггүй байсан бөгөөд яг л харь гаригийн тусдаа ангилалд хамааруулдаг байжээ.
Иймд 1871 оны 10-р сарын 24-ны өдөр Los Angeles хотын дан цагаан арьст эрчүүдээс бүрдсэн 800 орчим хүн өглөөний 6 цагт Хятад хорооллын захад ирж таарсан Хятад хүн болгоныг зодож заримыг нь буудаж эхэлсэн байна. Цагдаа нар хэргийн газар ирсэн ч ийм олон хүнийг дийлэхгүй байсан тул хариу буудалцан өглөөний 11 цагийн үед бослогыг дарсан байдаг. Тухайн дайралтаар яг 20 Хятад хүн амиа алдсан бөгөөд тэднийг бүгдийг нь дүүжилсэн байдалтай олджээ. Гэхдээ ихэнх нь дүүжлүүлэхээсээ өмнө амиа алдсан бөгөөд зөвхөн цогцсыг нь дүүжилсэн байж. Уг эсэргүүцлийн хөдөлгөөнд нийт 800 хүн оролцсон гэдэг нь тухайн үеийн LA хотын иргэдийн 8 хувийг бүрдүүлж байсан аж.
Гэвч албан бусаар LA хотод Манж гүрний Засгийн газрын байгуулсан гэрээний дагуу 1870 онд 3 Монгол хүн тус хотыг зорьсон гэх мэдээлэл байдаг байна. Хэрэв 3 Монгол хүн зорьсон нь үнэн бол тухайн үед Монгол Манж гүрний мэдэлд байсан тул уг хороололд л амьдарч байсан байж таарна. Гэвч нас барсан хүмүүсийн нэрсийн жагсаалтад нэг ч Монгол хүн байгаагүй нь хэрэг явдал манай талд тийм ч муугаар эргээгүйг гэрчилнэ.
