Өнөөг хүртэл 9587 коронавирусын тохиолдол батлагдаад буй Палестин улсад Жихад Аль-Сувайти хэмээх залуу халдвар авсан ээжийгээ орхиж чадахгүй байсан талаарх мэдээлэл дэлхий нийтийн анхаарлыг татлаа.
Хөгшин ээж нь вирусийн шинжилгээ нь эерэг гарсны дараа эмнэлэгт хэвтсэн бөгөөд аюулгүй байдлын үүднээс эмнэлэгт эргэлт оруулах боломжгүй байсан юм. Харин Хеброноос ирсэн 30 настай Жихад хоолойгоор дамжин дээш авирч, өдөр бүр эмнэлгийн цонхны гадна суун ээжийгээ хэр байгааг шалгадаг байжээ.
Эмнэлгийн ажилтан хэлэхдээ: Тэр өдрийн ихэнх хэсгийг ээжийнхээ хэвтэж буй өрөөний цонхны гадна өнгөрүүлж түүнийг эсэн мэнд байгаа эсэхийг шалгадаг байсан. Ээжийгээ унтсан үед л доош буудаг байсан гэжээ. Харамсалтай нь өнгөрсөн пүрэв гарагт түүний ээж өвчнөө дийлэлгүй хорвоогийн мөнх бусыг үзүүлжээ.
Ээж нь вирусийн эсрэг тэмцэж байгааг ажиглаж буй залуугийн сэтгэл хөдөлгөсөн энэ дүр зураг нийгмийн сүлжээнд тархсанаас хойш дэлхий даяар олон хүний сэтгэлийг хөдөлгөөд байгаа юм.
Жихад гэр бүлийнхээ хамгийн отгон хүүхдийн хувьд ээжтэйгээ илүү ойр дотно байжээ. Тийм ч учир тэрээр ээжийнхээ үгүй болсон талаар мэдээг сонсоод итгэж ядсан, цухалдсан байдалтай байсан талаар гэр бүлийнхэн нь хэлсэн байна. Мөн түүний ах хэлэхдээ Ямартай ч тэр одоо нөхцөл байдалтай эвлэрсэ гэжээ.
