Түүнийг Gotz Von Berlichingen гэх бөгөөд түүхэн сурвалжид ихэнхдээ “төмөр гарт Gotz” хэмээн бичигдсэн байдаг. Тэрээр Ариун Ромын эзэнт гүрэн буюу одоогийн Герман улсын тун гарамгай тулаанч, хөлөг баатар байжээ. Гэвч Gotz аль нэг хаан эсвэл ноёны талд хэзээ ч үүрд зүтгээгүй юм. Хэн хөлс өгнө түүнд зүтгэдэг нэгэн байжээ, өөрөөр хэлбэл уг эр хөлсний цэрэг байсан гэсэн үг.
1498-1544 оны хооронд нийт 47 жилийн турш Gotz тасралтгүй эзэн хаад болон ноёдод ээлж дараалан зүтгэсэн аж. Тэрээр нийт 50 гаруй тулаанд оролцож 15 өөр ноёны дор хүчин зүтгэснээс Германы тариачны бослого, Cologne, Ulm, Augsburg зэрэг олон хүний цус асгарсан томоохон тулаануудад амжилттай тулалдаж ялалт байгуулсан нэгэн.
1504 онд Gotz дөнгөж 23 настайдаа тулаанд оролцож байх үед Bavaria мужийн ван Albert IV-ын цэргүүдийн их бууны суманд түүний баруун гар нь оногдож идэр залуу насандаа нэг гараа бүрмөсөн алдсан түүхтэй. Орон нутгийн эмч нар түүнд мэс засал хийж амийг нь аварсны дараа Jagsthausen цайзын алдарт хоёр механикч эрчүүд “тулаанч хүн өрөөсөн гараа алдана гэдэг том эмгэнэл” хэмээн хэлээд тэд төмрөөр шинэ гар хийж өгсөн байдаг.
Гэвч түүний төмөр гар тийм ч болхи эд байсангүй. Чигчий хуруунаас бусад дөрвөн хуруу нь атгаж болон сул тавих боломжтой байв. Ингэснээс сэлэм барих боломжийг бүрэн бүрдүүлсэн аж. Хэдийгээр хүний жинхэнэ гартай яаж ч бодсон дүйцэхгүй боловч 16-р зууны эхэн үеийн шинжлэх ухаан уг зүйлийг бүтээсэн гэхэд үнэхээр итгэмээргүй. Мөн тухайн үед урлаг, гоо зүй нь философи болон нийгмийг харах өнцгийн нэн тэргүүний салбар болж байсан тул аль болох гоё харагдах үүднээс үрчлээс, үений нугалам, хумс зэргийг урлаж бүтээсэн байдаг. Түүнчлэн аварга том хэмжээтэй бамбайнаас эхлээд бэхний өдийг хүртэл барих боломжтой байсан нь хэр зэрэг нарийн механикийн ур ухаан гаргасныг харуулна.
Gotz 1505 оноос буюу гараа алдсанаас 1 жилийн дараанаас эхлэн үргэлжлүүлэн тулалдаж эхэлсэн юм. Тэрээр өөрийн намтрыг өөрийн хиймэл гараар нарийн өд барьж бэхэнд дүрэн бичиж дуусгасан гэдэг. Харин гар бичмэлийг нь 1981 онд хэвлэн гаргаж Европын зах зээлд худалдаалсан түүхтэй.
