Энэ бүх түүх Японы хаанчлагч Oda Nobunaga-ын эрин үед болсон бөгөөд бүр тодруулбал 1581-1582 оны хооронд анх эхлэл нь тавигдсан байх учиртай. Тухайн цагийн Италийн нэрт наймаачин, хамгийн баян хүмүүсийн нэг Jesuit гэх эрхэм Португалийн колони байсан Мозамбик улсаас нэгэн өнгөт арьст боол дагуулан арлын Япон улсад 1581 онд анх хөл тавьсан байдаг.
Тэнд Issufo гэх өнгөт арьст боолыг авчрах үед Японы ард түмэн түүний арьсны өнгийг тун ч их гайхан өөр ертөнцийн биет мэт анхааралтай ажиглан улмаар хаан Oda Nobunaga ч түүнийг биеэрээ үзэж сонирхсон баримт 1581 онд тэмдэглэгдэн үлдсэн юм.
Эзэн хаан уг боолыг тун их сонирхож байсан тул худалдаачин эр Issufo-г эзэн хаанд бүр мөсөн бэлэглэж арлын улсад үлдээгээд Европ тивийг 1582 онд зорьсон түүхтэй. Хаан болон хааны ордныхон хар хүнтэй тун нөхөрсөг харьцаж эхэлсэн бөгөөд түүнийг ихэд өндрөөр үнэлж нэрийг нь Японоор Yasuke болгон өөрчилж хувийн эдлэн газар, адуу бэлэглэж байжээ. Нэгэнт шинэ газар шинэ амьдрал зохиохоор болсон эр өөрийн чаддаг зүйлсээ хаанд үзүүлжээ. Тэр нь асар хөнгөн, шуурхай хөдөлгөөн байв.
Түүний ямар шалмаг хөдөлж байгааг харсан эзэн хааны нүдэнд өөрийн эрхгүй нинжаг санагдуулжээ. Харанхуй шөнө хар хувцастай, хар арьстай, асар хурдан хөдөлгөөнтэй уг эр нинжагийн албанд яг тохирох тул түүнийг самурай болгож зэвсэглэн өөртөө хүчин зүтгүүлсэн байна.
Гэвч энэ явдлаас хойш нэг их удалгүй 1582 оны 12-р сард эзэн хаан Akechi Mitsuhide-ын хүчирхэг армитай тулалдан уг тулаанд Yasuke тулалдсан ч амжилт ололгүй ялагдаж хар самурай амьдаараа олзлогдсон байдаг.
Харин баттай мэдэж байгаа зүйл гэвэл Yasuke-г армийн командлагч хөнөөгөөгүй явдал юм. Гэхдээ хамгийн харамсалтай нь уг үйл явдлаас хойш yasuke-ын тухай бичиж үлдээсэн ганц ч баримт, бичээс байдаггүй аж. Иймд түүнд чухам юу тохиолдож хэрхэн амьдарсныг хэн ч хэлж мэдэхгүй юм.
