“ОХУ, БНХАУ-ын хооронд орших Монгол Улс. Далайд гарцгүй, Төв Азийн 3 сая 300 гаруй хүн амтай жижиг улс. Манайхан өөрсдийгөө “том” гэж бодож, хаа байсан холын Америкийг бараадах. Гуравдагч хөршөө гэж Америкийг тахин шүтнэ.
Гэтэл, Орос, Хятад гэсэн Дэлхийд цэрэг армиараа хүчирхэг хоёр гүрний дунд орших хэрнээ нэг л их “даам” гарч дарвалзах Монголчууд. Монголчууд юу байх вэ. Төрийн толгойд буй хэсэг бүлэг нөхөд. Оросын телевизүүдээр өдөр болгон хэлэлцүүлэг нэвтрүүлэг шууд эфирээр цацагддаг. Оросууд Дэлхийд өрнөж буй том том үйл явдалд анхаарал хандуулж, арга зам, гарц шийдлийн талаар янз бүрийн үзэл бодлоо чөлөөтэй илэрхийлдэг. Афганистан, цаг уурын өөрчлөлт, байгалийн гамшиг, Америкийн сонгууль, Оросын сонгууль гээд том том сэдэв хэлэлцэнэ.
Жижиг улс хэрнээ “даам” гарчихсан улс гэж” монголчуудыг саяхны нэг хэлэлцүүлэгтээ дурсав. Дэлхийд тулгамдсан өч төчнөөн асуудал, сэдэв байхад хажуугаар нь жижиг Монголын талаар ийнхүү муугаар оросын Батлан Хамгаалах Яамны харъяа “Звезда” телевизийн хэлэлцүүлэгт дурсав.
Яг үнэндээ Орос ах нарын дургүйг Монголчууд хүргэсэн гэдгийг битүүхэндээ сануулав. Энэ нь манайд бензин, түлшний хомсдол үүсгэсэн гэхэд хилсдэхгүй. Манай төр засаг атгагчид Оросыг алгасаад, үл тоомсорлож, Америк, Япон, Өмнөд Солонгос гээд хөл алдан гүйлдэнэ. Хандив тусламж гуйн, алгаа тосно.
Гэтэл цаана чинь Оросууд, Хятадуудтай “нийлж” биднийг далдуураа бөөрөлхөж эхэллээ. Орос, Хятад монголд түлш нийлүүлэх болвол яг адилхан үнээр өгнө гэсэн байгаа юм. Энэ юу гэсэн үг вэ гэхээр, тэд цаагуураа “тохиролцоо” хийсэн нь илт харагдаж байна.
Бид бол эдийн засаг, нийгмийн хувьд Орос, Хятад гэсэн мөнхийн хөршөөсөө бүр зуун хувь хамааралтай. Хятадууд эртнээс нааш монголчуудыг өөрсдийн нэг муж улс болгох санааг агуулсаар ирсэн. Тэд бүр Дэлхийн газрын зураг дээр Монгол гэсэн тусгаар тогтносон улсыг маань өөрсдийн нутаг дэвсгэрт тооцож, газрын зургийг өөрчилсөн.
Муугаар бодоход Хятадууд биднийг эзэллээ гэхэд ганц аврах аврагч нь өнөөх Орос ах нар. Ерөнхийлөгч Владимир Путины гадаад бодлогын нэгд Монгол улстай харьцах гадаад бодлго зүй ёсоор ордог. Есдүгээр сарын 17-19-ний хооронд оросын Төрийн Думын сонгууль болж өнгөрлөө. Сонгуульд эрх баригч нам болох, /Ерөнхийлөгч Путины харъяалагддаг/ “Нэгдсэн Орос” /Единая Россия/ Нам ялалт байгуулчихлаа. Путин Ерөнхийлөгч хэзээнээс монголчуудад элэгтэй хандсаар ирсэн. Бид үүнийг мэднэ.
Жишээ дурьдах шаардлагагүй мэднэ. Ерөнхийдөө бид орос ах нарын дургүйг, ялангуяа Владимир Путины дургүй, зэвүүг хүргэж болохгүйсэн. Оросууд бидэнд талтай байдаг энэ давуу талыг бид буруу ашиглаж, хилэгнүүлээд хэрэггүй шиг санагдана.
Нэгэнт газар нутгаараа мөнх холбогдсон болохоор хаашаа ч зугтах аргагүй. Нүүдэлчин ард түмэн болохоороо бид бүгдээрээ Дэлхийгээс зайлаад Илон Маскийн сансрын хөлгөөр Ангараг гариг руу нисчихэж чадахгүй болохоор хөнжлийнхөө хэрээр хөлөө жийвэл яасан юм бэ. Жаахан бодолтойхон шиг хоёр хөрштэйгөө учраа ололцоод явчихвал уг нь болмоорсон.
Яг иймэрхүү утга агуулгатай зүйлийг Орос ах нар хэлэлцүүлэгтээ дурсаж, цаагуураа Монголчуудад дохио өгөөд авлаа. Тиймээс, бид ах нарын үгнээс гарвал дараагийн удаа бидний эсрэг ямар арга хэмжээ авч биднийгээ хашраах юм бол.
