Байгаль, орчин аялал жуулчлалын яам, Нийслэлийн мэргэжлийн хяналтын газар болон “Таван Толгой Түлш” компаниас өнөөдөр /2021.12.27/ нийслэлийн агаарын чанарын нөхцөл байдлын талаар мэдээлэл өглөө.
Энэ үеэр Нийслэлийн мэргэжлийн хяналтын газрын Агаарын чанарын хяналтын хэлтсийн дарга Н.Нарангэрэл өнгөрсөн долоо хоногт хийсэн хяналт, шалгалт үр дүнгийн талаар мэдээллийг хүргэлээ. Тэрбээр Нийслэлийн 135 мянган ААН, өрхөд хяналт шалгалт хийхэд түүхий нүүрс хадгалж байсан дөрвөн зөрчил илэрсэн талаар онцоллоо.
Ингэхдээ “Мэргэжлийн хяналтын байгууллагаас түүхий нүүрсний хэрэглээг хориглосон засгийн газрын 62 дугаар тогтоолын хэрэгжилтийг хангуулах ажлын хүрээнд авто тээврийн шалган нэвтрүүлэх товчоо, “Таван Толгой Түлш” компанийн үйлдвэрлэлийн үйл ажиллагаа, шахмал түлшний борлуулалтын цэгүүд гэсэн газруудад хяналт, шалгалт хийлээ.
Хяналт, шалгалтын долоо хоногийн мэдээллээр авто тээврийн шалган нэвтрүүлэх товчоон дээр агаарын чанарыг сайжруулах бүсэд мөрдөх журам зөрчсөн хоёр үйлдэл илэрсэн.
Улаанбаатар хотоос сайжруулсан шахмал түлш авч гарахыг завдсан нэг зөрчил илэрсэн. Үүнд зөрчлийн тухай хуулийн дагуу торгуулийн арга хэмжээ ногдуулсан. Мөн түүхий нүүрс Улаанбаатар хот руу нэвтрүүлэхийг завдсан нэг зөрчлийг илрүүлж, хуулийн арга хэмжээ авсан байгаа.
“Таван Толгой Түлш” компанийн үйлдвэрлэлийн үйл ажиллагаанд тогтмол хяналт, шалгалт хийж байна. Баруун бүсийн үйлдвэрийн хоёр шугамаас дээж авч, лабораторийн шинжилгээнд хамруулсан. Шинжилгээний дүнгээр шахмал түлшний хөрслөг, чийглэг, дэгдэмхий, бат бөх, хүхэр зэрэг үзүүлэлтүүд нь монгол улсын стандартын шаардлагыг хангаж байна гэж гарсан. Үүнд 135 мянган аж ахуйн нэгж, өрх хамрагдсан.
Энэ хяналт, шалгалтаар дөрвөн зөрчил илэрлээ. Эдгээр зөрчлүүдэд хуулийн дагуу арга хэмжээ авч, хариуцлага тооцсон байгаа.
Эдгээр дөрвөн зөрчил нь есөн шуудай, долоон шуудай, гурван тонн орчим гэх мэт түүхий нүүрс хадгалж байсан байна. Үүнд торгуулийн арга хэмжээ авсан байгаа” гэсэн юм.
