УИХ-ын чуулганы өнөөдрийн хуралдаанаар “Тогтоолын хавсралтыг шинэчлэн батлах тухай” Улсын Их Хурлын тогтоолын төслийг хэлэлцэж байна.
“Монгол Улсыг 2021-2025 онд хөгжүүлэх үндсэн чиглэл”, “Монгол Улсын 2021-2025 оны хөрөнгө оруулалтын хөтөлбөр”-ийг боловсруулж, Улсын Их Хурлын 2020 оны 23 дугаар тогтоолоор баталсан.
Тогтоолын хавсралтыг шинэчлэн санхүүжилтийн эх үүсвэр бүрэн болон хэсэгчлэн шийдвэрлэгдсэн төсөл, арга хэмжээний жагсаалтад нийт 45.4 их наяд төгрөгийн санхүүжилт бүхий 136 төсөл арга хэмжээ, санхүүжилтийн эх үүсвэрийг шийдвэрлэх шаардлагатай төсөл, арга хэмжээний жагсаалтад нийт 31.5 их наяд төгрөгийн санхүүжилт шаардлагатай 135 төсөл арга хэмжээ, ТЭЗҮ, зураг төсөл боловсруулах шаардлагатай төсөл, арга хэмжээний жагсаалтад нийт 89 төсөл арга хэмжээг тусгажээ.
УИХ-ын гишүүн, Байгаль орчин, хүнс, хөдөө аж ахуйн байнгын хорооны дарга Х.Болорчулуун:
Сав, баглаа боодол, оймсноос авахуулаад бүх зүйлийг валют төлөөд гаднаас авч байна. Үндэсний үйлдвэрлэлээ дорвитой дэмжмээр байна. ГХЯ бол нэг элчин томилдог яам биш. Экспорт, импортын тариф дээр ажиллах ёстой. Импортын татвараа нэмэгдүүлж байж үндэсний үйлдвэрлэлээ хөгжүүлж чадна. Тавхан хувийн импортын татвартай байхад үндэсний үйлдвэрлэл хөгжихгүй.
Төсвийн цоорхойгоо зээл авч нөхөөд л байдаг. Хэрэгтэй, хэрэггүй зээлийн асуудал УИХ-аар орж ирж байна. Саяхан малчдын хашаа, хороог барьж өгөхөд 54 сая ам.долларын зээлийн асуудал орж ирсэн. Тийм зээлийг баталж болохгүй.
ХХААХҮ-ийн сайд Л.Мэндсайхан: Үр ашиггүй зээлийг авахгүй гэдэгт санал нэг байна. Харин хийгдчихсэн хэлэлцээрийг үр ашигтай болгох чиглэлд ажиллаж байгаа.
УИХ-ын гишүүн, Байгаль орчин, хүнс, хөдөө аж ахуйн байнгын хорооны дарга Х.Болорчулуун:
ХАА-н салбар чадан ядан ажиллаад монголоо тэжээж байгаа. Дэлхий дээр өнөөдөр ийм хямдхан мах идэж байгаа, нэг ширхэг нь 1000 төгрөгийн талхтай, нэг килограмм нь 1000 төгрөгийн гурилтай газар байхгүй.
ХАА-н салбараа улам сайн дэмжиж, хөнгөн үйлдвэрүүд хөгжих ёстой. Үйлдвэрүүдээ тарифын бодлогоор дэмжиж байх ёстой.
