Хятад улсад 11-р сарын 1-нээс шинэ хууль хүчин төгөлдөр хэрэгжиж эхэллээ. Интернэтэд худал мэдээ нийтэлсэн, цуурхал тараасан тохиолдолд одоо Хятадад ш.оронд 7 жил хүртэл х.орих я.лаар ши.йтгэхээр болжээ.
Бүх Хятадын Ардын төлөөлөгчдийн XVI их хурал 8-р сарын 29-нд хуралдаад улсынхаа Эрүүгийн хуульд 9 дэх залруулгаа хийсэн билээ. Байгалийн гамшиг, цагдаагийн талаар интернэтэд цуурхал, хов жив тараадаг хүмүүсийг 3 жил хүртэл өргөст торны цаана суулгахаар шинэ хуульдаа тусгажээ. Харин эдгээр мэдээ, цуурхал нь олон нийтийн дэг журмыг алдагдуулж, “ноцтой үр дагавар”-т хүргэсэн бол 3-7 жил хорих юм байна.
Ер нь Хятадад хов жив, цуурхал болон доромжилсон нийтлэлийг 5000-аас дээш удаа үзсэн буюу 500 гаруй удаа хуваалцсан бол э.рүүгийн хариуцлагад татдаг юм байна.
“Хятадын Коммунист нам одоо нийгмийн тогтворгүй байдал гэсэн нэрийн доор энэ шинэ хуулиараа хэвлэлийн эрх чөлөөг хязгаарлаж эхэллээ. Тэгээд ч гүйцэтгэх засаглал шинэ хуулийг хэр шударга хэрэгжүүлэх талаар асуудал байна” гэж Хятадын зарим шүүмжлэгч бичжээ.
Хунань мужийн идэвхтэн У Бяофэн “Албан ёсны мэдээлэл бага учраас Хятадын интернэтэд цуурхал, хов жив тардаг. Энэ шинэ хуулийг тоймчид, идэвхтнүүд, диссидентийн эсрэг ашиглана гэж айж байна. Төр засаг шүүмжлэлийг тэвчдэггүй. Энэ бол хуулийн нэрийн өмнөөс эрх чөлөөг боомилж, нийгэмд айдас хүйдсийн уур амьсгал бий болгох гэсэн арга” хэмээжээ.
“Үнэ ба худал мэдээллийг үнэлэх, ялгах салгах аргачлал тодорхойгүй. Хэрэглэгч зориуд, санаатай цуурхал тараасан уу, эсвэл өөрөө интернэтийн худал мэдээнд хууртагдсан уу гэдгийг яаж тодорхойлох юм бол? Эрх баригчид яаж л бол яаж ашиглахаар хуулийн үг үсгийг зохиожээ” гэж У Бинь гэдэг өөр нэг идэвхтэн бичсэн байна.
Хятадын төрийн мэдлийн хэвлэл мэдээллийн байгууллагууд өөрсдөө эдийн засаг, байгалийн гамшиг ба бусад осол сүйрлийн талаар худал мэдээлдэг гэж зарим шүүмжлэгч үзэж байгаа аж.
У Бинь “Хятадын эрх баригчид үнэн хэрэгтээ ард түмнээсээ шаардахын өмнө эхлээд өөрсдөө үлгэр дуурайлал үзүүлэх ёстой. Шинэ хууль мэдээж “50 центийн нам”-д хамаагүй байх” гэжээ.
50 центийн нам гэдэг нь эрх баригчдыг дэмжин өөр бодолтнуудыг шүүмжилж интернэтэд мөнгөөр пост нийтэлдэг хүмүүсийг хэлдэг юм байна.
