Энэ гайхалтай үйл явдал 2014 онд ОХУ-ын Якут мужийн хөдөө нутагт болжээ. Тухайн оны зун орон нутгийн анчин эр болох 42 настай Igor Vorozhbitsyn загас барихаар ойролцоо орших голын эрэг дээр дэгээгээ тавиад тайван амгалан сууж байжээ. Угаас Якутын гол загас ихтэй тул 30-аад минут суухад хэдийнээ гурван загас барьчихсан байлаа. Ашиг орлого олох үүднээс бус нэг талаараа хоббигоороо болон нөгөө талаараа гэрийнхэндээ амталсан загас шарж өгөх гэсэн тэрээр зорилгоо ч биелүүлэн бүх юм аа хураагаад эргэж хартал модны захаас аварга том баавгай өөрийг нь чиглэн ирж байж таарчээ.
Igor Vorozhbitsyn зугтах гэсэн боловч баавгай тун хурдтай түүнийг гүйцэж ирээд гэдэс орчимд нь хүчтэй цохисон байна. Уг цохилтоос үүдэн загасчин эр нисэж газарт саван унаж тархи болон гараа гэмтээжээ. Түүнчлэн гэдэсний зарим хэсэг нь ч хэдийнээ ярагдсан байв. Баавгай улам бүр догшрон түүн уруу дөхөж ирэв. Энэ бүхнийг харсан загасчин эр ингээд л өөрийгөө үхдэг юм байж гэж бодтол гэнэт гар утас нь дуугарах нь тэр.
Түүнийг загасанд явахын өмнөх шөнө бяцхан охин нь Justin Bieber-ын “baby” дууг гар утасны дуудлага дээр нь тавьчихсан байжээ. Гэтэл баавгай түүнд ойртох үед “baby” дуу хамаг чангаараа дуугартал өнөөх баавгай гэнэт цочин загасчныг орхин хамаг хурдаараа зугтсан байна. Ийнхүү Justin Bieber санамсаргүй тохиолдлоор хүний амь аварсан аж. Магадгүй түүний утсан дээр өөр илүү намуухан эхлэлтэй дуу байсан бол Орос эр хэдийнээ амиа алдсан байж байхыг ч үгүйсгэхгүй юм.
