1980 онд гэрэл зурагчин Mike Wells энэхүү зураглалыг бүтээснээр түүнийг нэр алдарт хүргэж нөгөө талаар Уганда улсыг олон улсын анхаарлын төвд авчирсан байдаг. Өлсгөлөн хүүгийн гарыг харахад хүний гар гэж хэлэх тун хэцүү. Харь гаригийн ямар нэгэн биет, өөр амьтны гар мэт харагдах боловч энэ бол яалт ч үгүй өнгөт арьст бяцхан хүүгийн гар юм. Өлсгөлөн өнгөт арьст хүүгийн гар.
Чөлөөт уран бүтээлч болох Mike Wells энэхүү зургаа Holland Herland сэтгүүлч тайлбартай нийтэлсэн даруйдаа тухайн оны дэлхийн хэвлэлийн гэрэл зургийн шагналыг хүртсэн байдаг. Үүний дараагаар гэрэл зурагчин эр дахин Уганда явж тэндээ олон улсын байгууллагууд, дэлхийн хүн төрөлхтнөөс хандив цуглуулан өнчин хүүхдүүдийг хооллож, асрах байгууламж нээсэн түүхтэй.
Тус улсад өлсгөлөн болсон явдал нь ерөнхийлөгч Idi Amin-тай салшгүй холбоотой бөгөөд хүнсний ногоо, ургамлуудыг 1978 оноос эхлэн хортон шавж их хэмжээгээр идэж эхэлжээ. Нутгийн иргэд, тариаланчид холбогдох засгийн газрын байгууллагуудад удаа дараа мэдэгдсэн боловч ерөнхийлөгч ямар ч хариу арга хэмжээ авалгүй байсаар 1980 он гэхэд ямар ч ургацгүй болсон байна. Үүнийгээ дагаад үхэр, ямаа зэрэг амьтад их хэмжээгээр үхэж жинхэнэ утгаараа өлсгөлөн эхэлсэн байдаг.
Африк тивд католик шашинтны лам хуврагууд олноор орж ирж тэд сүм байгуулан тэндээ хүмүүсийг хооллож байлаа. Олон улсын байгууллагуудаар хэдий их хэмжээний тусламж, бараа ирдэг байсан ч зэвсэглэсэн дээрэмчид үе үе халдаж бүх нөөцийг дээрэмддэг байсан аж. Тус улсад тухайн цаг үед иргэний дайн болоогүй байсан хэдий ч зэвсэгт дээрэмчид хоол хүнсний дутагдлаас болж бүлгэм байгуулж дээрэм хийдэг болсон нь энэ юм. Харин Mike Wells уг зургаараа өөрийгөө хэзээ ч дэлхийн фото хэвлэлийн шагнал авна гэж тооцоогүй, бүр тус шалгаруулалтад оролцоо ч үгүй юм. Гэвч түүнд шагнал өгсөн явдал нь Mike-ыг хүмүүсээс ичиж санаа зовмоор байдалд оруулж уг зургийг дарсандаа бага зэрэг харамсаж буцаж Африк явж хүмүүст зураг дарж биш сэтгэлээсээ нэмэр болж туслах сэдлийг өгсөн түүхтэй.
