1965 онд АНУ-ын Массажуситс мужийн далайн эрэг дээр Блэйсийн гэр бүлийнхэн амралтын өдрөө өнгөрүүлэхээр очсон байдаг. Тэднийх 3 хүүхэдтэй айл бөгөөд хамгийн бага хүү нь тухайн үед дөрвөн настай байжээ. Эцэг эх нь далайн эрэг дээр бие ээ шарангаа шар айраг ууж хүүхдүүд нь далайн усны давалгаанд цохигдон тоглож бүх зүйл эхэндээ хэвийн сайхан байж. Эцэг эх нь заримдаа нэг хүүхдүүдээ эргэж харахад тэд далайн усанд бөмбөг тоглон эргэн тойронд нь ч олон хүмүүс байсан тул нэг их санаа зовоогүй аж. Гэвч том хоёр хүү нь сандарсаар эцэг эх дээрээ гүйн ирэх нь тэр. 4 настай бяцхан Алиса Блэйс гэнэт сураггүй алга болох нь тэр.
Ойролцоо явж байсан эргийн аврагчаас тусламж гуйн тэд цөм далайн ус уруу орсон боловч хүү огт олдоогүй байна. Ингээд байж байтал 100 орчим метрийн цаанаас нэгэн бүсгүй тэдний зүг орилж байгаа харагдав. Бүгд гүйлдэн очиход тэдний 4 настай хүү ухаан улдсан байдалтай байх бөгөөд уг бүсгүй хиймэл амьсгаа хийж байлаа. Гэвч тун удалгүй хүү гэнэт ухаан орж эцэг эх нь магнайгаа хагартал баярлах нь тэр. Талархсан эцэг эх бүсгүйн нэрийг асуухад Жүдит хэмээн хэлсэн бөгөөд 4 настай жаал хүүгийн дурсамжид аврагчийнх нь нэр болон царай үүрд мөнх хадгалагдан үлджээ.
Энэ явдлаас яг 9 жилийн дараа гэхэд Алиса Блэйс хүү 13 нас хүрч сургуулийнхаа усанд сэлэлтийн шигшээ багийн тамирчин болсон байв. 13 нас хүрдэг зун өөрийнхөө 9 жилийн өмнө очиж байсан далайн эрэг дээр дахин очиж эрэг дагуу алхаж байтал далайн нэлээд гүн хэсэгт толгой нь цухуйхгүй боловч хоёр гар дээш сарвалзаж байгаа харагдсан байна. Хамгийн аймшигтай нь тэр хүн улам бүр далайн гүн уруу самардаж байгааг хараад өмссөн хувцастайгаа далайн ус уруу үсэрч орон живж байсан эрийг аварч далайн эрэг дээр хиймэл амьсгал хийжээ. Тэнд байсан бүх хүмүүс 13 настай хүүгээр бахархан байтал тэдний дундаас “миний нөхөр” хэмээн нэг бүсгүй орилжээ. Хүү эргэж хартал өөрийг нь 9 жилийн өмнө аварч байсан Жүдит бүсгүй байв. Тэр хоёр шууд л бие биенээ танин удалгүй нөхөр нь ч ухаан орсон байна. Ер нь иймэрхүү тохиолдлууд амьдрал дээр цөөхөн ч гэсэн хамгийн гол нь тохиолдож л байдаг аж.
