1940 оны 5-р сарын 10-ны өдөр Германы нисэх хүчин Ландсбергийн нисэх буудлаас өдрийн 14:27 минутад Францын Дижон хотыг бөмбөгдөхөөр хөөрсөн байна. Энэ нь Францыг эзлэх дайны төлөвлөгөөний нэгэн хэсэг байсан боловч уг дайралт санаанд оромгүй буруугаар эргэсэн юм. Өдрийн 15:59 минутад Германы Фрейбург хотын тэнгэрт бөмбөгдөгч онгоцнууд нисэж байгаа харагдав, дайнд ялалт байгуулж байгаа Германы иргэд өөрсдийн онгоц хэмээн бодон нэг их тоолгүй байтал гэнэт тэдний дээрээс бөмбөгдөж эхлэх нь тэр. Сандарч балмагдсан Германчууд нуугдаж болох газруудыг бараадан Францчууд өөрсдийг нь бөмбөгдөж байна хэмээн итгэв. Гэвч үнэн хэрэгтээ Францчууд бус Германчууд өөрөө өөрсдийгөө бөмбөгдсөн нь бүр хожим ил болсон юм.
Германы нисэх хүчин өөрийн хот дээрээс 69 удаагийн бөмбөгдөлт хийж 57 энгийн оршин суугчийг хөнөөсөн байдаг. Ажиллагаа эхлээд нэг их удаагүй байтал Фрейбург хотын нисэх газраас тэдэнд Германаар анхааруулга өгөх үед л нисгэгчид өөрийн хотоо бөмбөгдөж байгаагаа ойлгосон байна. Германы цэргийн дээд зөвлөл ажиллагааг яаралтай цуцлан бүх онгоцыг бааз уруу буцаасан юм. Чухам хэн ийм алдаа гаргасан болохыг олж тогтоотол уг ажиллагааг ахалж байсан нэгэн ахмад байжээ. Түүнд хатуу шийтгэл оногдуулах гэсэн боловч Францын эсрэг маш чадварлаг тулалдан агаарт 14 удаагийн ялалт байгуулсныг нь үнэлэн ямар ч шийтгэлгүй өнгөрөөсөн байдаг.
Харин Фрейбург хотын иргэд өөрсдийгөө чухам хэнд бөмбөгдүүлснээ мэдэж амжаагүй байтал Германы радиогоор Францын нисэх хүчин өөрсдийг нь бөмбөгдсөн хэмээн гүтгэсэн мэдээлэл тараажээ. Ийнхүү бүх явдлыг дарж зөвөөр эргүүлсний эцэст хэргийн материалыг бүхэлд нь устгасан байна. Гэвч хэрэг хуучирдаггүй учир Герман дэлхийн хоёрдугаар дайнд ялагдсанаас 20 жилийн хойно уг хэргийг ил болгожээ. Түүнчлэн Дижон болон Фрейбург хот нь хоорондоо агаарын замаар 180 км-ын зайтай оршдог хил залгаа бүс нутгийн хотууд аж.
